De formatge de Ròcafòrt d’Apelacion d’origina protegida (AOP) vendut jos una dotzena de marcas es estat retirat de la venta pr’amor de la deteccion de la bacteria E.Coli sus un produch, segon anoncièt divendres la societat Gabriel Coulet.

Los produches tocats son estats comercializats jos las marcas Cosse Noir, La Petite Cave, GAR, Patrimoine Gourmand, Auchan, Notre Sélection, Pâturages, Rocabret, Monoprix Gourmet, Cora, Maison des gourmets e Le Fromager, segon ditz lo productor dins un comunicat.
 
Los formatges son estats comercializats dins de botigas d’Atac, Auchan, Brake, Carrefour, Cora, Intermarché, Leclerc, Match, Mètro, Monoprix e Système U jols numèros de lòts 120406152, 120406156, 120406157, 120406159, 120406160, 120406164, 120406165, segon informacions de Midi Libre.
 
Lo productor de Ròcafòrt (Causse de Larzac) ditz qu’”un contraròtle a mes en evidéncia la preséncia de [la bacteria] Escherichia Coli 026:H11. Alavetz, s’a demandat a las personas qu’aurián aqueles produches de los consomar pas e de los raportar dins los ponches de venta ont los an crompats”.
 
La bacteria “es estada detectada al moment d’un autocontraròtle efectuat per Monoprix sus una lesca” a dich a l’AFP lo responsable de la qualitat de la societat Jérôme Fabre. “Per precaucion, nos sèm decidits de procedir a l’apèl, malgrat que degun es vengut malaut”.