Mobilizacion per evitar la demolicion de la bastissa, qu’aculhiguèt 1500 orfanels armènis pendent 21 ans. Demièg los sieus residents i aviá Hrant Dink. “Sèm davant un dels testimònis mai importants d’una cultura que resistís”, çò dison los activistas. L’HDP sosten la resisténcia.

Ongan, que se commemòra lo centenari del genocidi armèni dins  l’Empèri Otoman, la comunautat armènia de Turquia atenh una visibilitat pauc abituala dins aquel país —e o fa d’un biais qu’èra, a priòri, pauc previsible—. De grops d’activistas armènis defendon dempuèi doas setmanas un ancian orfanelat del quartièr de Tuzla, a Istambol, de sa demolicion. Lo complèxe aculhiguèt d’enfants armènis orfanèls, e ara es a venir un nòu simbòl de la preséncia armènia en Turquia.
 
L'orfanelat de Gedikpasa, tanben conegut coma Kamp Arman, aculhiguèt aperaquí 1500 orfanèls armènis entre 1962 e 1983, ont barrèt. La bastissa e sos terrens, proprietat de la Glèisa Evangelica Armènia, foguèron expropriats per l’Estat turc e an cambiat mai d'un còp de proprietari. A l’ora d’ara son proprietat de Fatih Ulusoy, qu’aviá decidit de demolir l’orfanelat per i bastir de nòvas bastissas.
 
Lo 6 de mai, los buldozèrs comencèron la demolicion d’una part de Kamp Arman, mas la resisténcia d’un grop d’activistas armènis —dont l’èx-resident de l’orfanelat Garabet Orunöz e lo politician Garabet Paylan, del partit pròcurd HDP— convenquèron los obrièrs d’arrestar la demolicion. Ulusoy foguèt d’acòrdi per remandar la demolicion fins que se trobèsse una solucion al contenciós. Los activistas vòlon que la bastissa se presèrve e que venga un memorial e un espaci cultural de la comunautat armènia de Turquia.
 
 
De gàrdias per evitar la desaparicion d’un simbòl
 
Dempuèi lo 6 de mai, de grops d’activistas fan de torns a l’orfanelat per evitar lo retorn de las maquinas. Demièg eles, son actius los membres de l’iniciativa Nor Zartonk (“Nòva Renaissença”, en armèni), una associacion que reclama la plaça de la comunautat armènia dins una Turquia democratica, egalitària e alonhada del nacionalisme turc.
 
“L’orfanelat, lo bastiguèron pels enfants que poguèron escapar [al genocidi] de 1915”, çò remembra l’entitat dins un comunicat. Lo simbolisme de Kamp Arman es grand: i visquèt l’escrivan armèni-turc Hrant Dink, assassinat en 2007 per un jove ultranacionalista turc. “Sèm davant un dels testimònis mai importants d’una istòria, d’una geografia e d’una cultura que resistisson”, çò argumentan a Nor Zartonk.
 
Los activistas an obtengut lo sosten d’entitats armènias de la diaspòra e tanben d’organizacions e de grops de vesins e d'estudiants d’Istambol, pas necessàriament membres de la comunautat armènia. Tanben del partit HDP, que defend una Turquia multiculturala ont sián reconegudas e respectadas totas las comunautats que i residisson, tanben l’armènia.
 
 
 
 
 

---

Aquesta nòva es adaptada de Nationalia amb qui Jornalet a un acòrdi de cooperacion