Après aver tocat gèir las termèiras deu país a Anonai, lo Tour 2012 dintra uèi en Occitània, per la tretzau etapa entre Sant Pau de Tricastin e lo Cap d'Agde.

Delà las dificultats que shegotissen regularament lo monde ciclista professionau, lo Torn demòra una espròva esportiva màger en Occitània. Cada an, son centenats de milèirs d'espectators, estivants com locaus, que se mudan per anar remirar los corredors. Atau, las carrèiras de la còsta mediterranenca (per la preséncia d'una granda quantitat de toristas) e las montanhas pirenencas (que sons pòrts jugan sovent un ròtle deus determinants per lo debanament de la corruda) se son hèitas dempuish detzenas d'annadas una plaça au moment de causir lo percors de la granda bocla.

Esportivament, l'anglés Bradley Wiggins partirà uèi dab la camisa jauna solidament passada. De hèit, se ved mau qui li poiré tirar. Hòra deu son companh Christopher Froome, digun a pas semblat capable de har tremolar la dominacion de l'ancian pistaire. Dab los autes favorits relegats a mantuna minutas, e dab un percors que sembla l'avossin traçat per balhar la victòria ad aqueth especialista deu contra-relòtge, farré una defalhança importanta per cambiar las donadas. Mès en ciclisme mei encara que dens los autes espòrts, arren n'es pas jamei jugat avant lo darrèir esprint.

Costat occitans, podem saludar la polida segonda plaça, gèir, deu tolosenc Jean-Christophe Peraud, que participarà aus Jòcs Olimpics de Londres dens l'espròva de cross-country en BTT. Los autes auràn d'esperar una escapada suspresa per poder lusir sus aqueth Torn. Mès benlèu qu'a comptar de dimenge, los Pirenèus e sas mareas de seguidors bascos balharàn ideas au marmandés Pierrick Fedrigo (69au au generau arsèir), au bordalés Blel Kadri (89au au generau arsèir), au biarnés Matthieu Ladagnous (107au), au castrés Jean Marc Marino (138au) o au girondin Yann Huguet (154au).




Pèir-Joan Masdiset