Al collègi Georges Brassens de Latas (Montpelhierenc), quatre Emplecs Avenir Professors, foguèron recrutats en 2015. Aqueste dispositiu permet a d’estudiants que vòlon èsser professors, de se confrontar amb la realitat del terrenh, dins un collègi, una escòla o un licèu. Cada estudiant pòt bastir de projèctes en foncion de son especialitat. A Latas, Morgane Auriol a, per exemple, creat un talhièr de teatre. Naís Albèrt, estudianta d’occitan a la Facultat Pau Valèri de Montpelhièr, bastís dempuèi tres ans, en collaboracion amb son tutor, François Toulouse, de projèctes en occitan.
 
L’an passat, èra question de trabalhar sul Patrimòni Cultural Immaterial: los collegians an fach de recèrcas suls espòrts e la musica occitana. Vist lo taus de satisfaccion que lo coneguèt l’activitat al prèp dels collegians, tornèron prepausar lo projècte: aquela idèa foguèt acceptada pel principal del collègi, Sénher Cauquil.
 
Los objectius son totjorn parièrs: permetre a l’escolan de se familiarizar amb sa cultura locala. En luòga de partir sus una tematica generala, foguèt decidit de partir d’un personatge occitan: Georges Brassens. L’òme que balhèt son nom al collègi. Per dintrar al dintre del projècte, l’objectiu final foguèt establit: realizar un vidèo, coma s’èra un reportatge per un jornal televisiu, e inclure una part en occitan. Lo títol serà: Georges Brassens, personatge occitan. Per balhar al projècte mai de vam, una collaboracion foguèt establida amb una escòla del quartièr. A la fin de l’annada, totes los escolans, CE2 al CM2, e la classa de 6a, siá 100 escolans, cantaràn, en occitan, “L’auvernhat”.
 
Pel moment, lo projècte se contunha un pauc mai cada setmana. La motivacion dels collegians es exemplara. Quand lo projècte serà acabat, un vidèo será retengut e serà mandat a totes los collègis e licèus d’Occitània qu’an per nom Georges Brassens.
 
 
 
 
Naís Albert
 
 
 

---

* Lo mot “rempaïsar” foguèt empruntat a un discors de Robèrt Lafont.