Jérôme Cahuzac, ministre delegat au budget, declaret sus la chadena France 2 dimecres de matin que “lo govern aurà pas d’autras chausidas que d’abandonar certans projectes” d’infrastructuras de transpòrts.

S’interroget sus l’interès de prolonjar de las linhas de TGV “per una ganha de temps marginala”. Adonc que, segon se, seriámai urgent de consacrar quilhs sòus per l’entreten de las linhas segondàrias. Lo ministre sec las preconizacions de la Cort daus Comptes per çò de la reducion dau defícit public.  
 
D’efiech, dins l’encastre dau Grenelle de l’environament de 2007, eran previsdas 14 linhas de granda velocitat siá 2000 km per 260 miliards d’euros d’investiment. Mas França a pas pus los mejans de se las paiar. Lo govern aurà de chausir e s’ajudarà d’una comission de parlamentaris e d’experts que classarà los projectes segon lor prioritat. Per Frédéric Cuvillier, ministre daus Transpòrts, faudrà “visar çò qu’apòrtan los projectes per çò de l’amainatjament dau territòri, la fractura territoriala e la creissença.La còpia es de rendre a la fin de l’annada.
 
En Occitània, dos projectes se deurián far tot-parier: la linha Tors-Bordèu desjà en construccion e lo contornament Nimes-Montpelhièr que lo contrat es signat. Per contra, la linha Niça-Marselha fai partida de las menaçadas: un projecte
tròp char – 15 miliards d’euros, p’un consensus sus lo traçat e una reduccion de la
durada d’un viatge París-Niça pas sufisenta per concurrenciar l’avion. Parelhament per la liason Peitieus-Limòtges e lo prolonjament de la linha París-Bordèu d’acianta a Espanha, char e que suscita una oposicion fòrta en País Basc. Se podriá far nonmàs d’acianta au Mont o Dacs.  
 
La linha Bordèu-Tolosa serà benleu sauvada perque permetrà de far l’anar-venir dins la jornada. Mas los elegits locaus migran tot-parier. Alain Rodet, mera de Limòtges, e Martin Malvy, president de la region Miegjorn-Pireneus, contacteron Jérôme Cahuzac per s’assegurar dau finançament de lors linhas. Declareron que lo ministre lo lor aviáconfirmat.  
 
Per los opausants qu’es ‘na bona novela. Per Charles d’Huyvetter, portavotz dau collectiu anti-LGV d’Òlt-e-Garona, lo projecte entre Tolosa e Bordeu era de la folia. “Qu’es aberrant de parlar d’un projecte de 8 miliards entre Tolosa e Bordeu que s’adreça nonmàs a un eleit que se desplaça de metropòli en metropòli” çò disset.
 
Christine Bessonnart, merauda de Senpere (País Basc) declaret que “l’Estat ven rasonable per de las rasons financieras, pren la mesura de tots los degalhs financiers, environamentaus e umans que la construccion d’una novela linha
Produriá”.




Maime Caillon