Un nòu pas endavant dins la normalizacion de l’ensenhament en catalan en Catalonha Nòrd. A partir de l’annada escolara que ven, Perpinhan dispausarà de doas escòlas d’Arrels, lo sol tipe de centre public immersiu en catalan. Lo nòu centre, que comptarà inicialament doas classas per 50 escolans, partejarà l’espaci amb una escòla tradicionala dins lo quartièr del Vernet, al nòrd de la vila. La conselhièra d’educacion de la Comuna de Perpinhan, Nathalie Beaufils, a soslinhat que lo nòu centre permetrà de “satisfar una demanda creissenta” e de descongestionar l’actuala escòla d’Arrels, qu’amb los sieus 245 escolans, fasiá longtemps qu’èra “desbordada”.
 
Amb la segonda escòla d’Arrels, l’annada escolara que ven, près de 1000 escolans estudiaràn en catalan a Perpinhan. Beaufils a reconegut que l’escòla d’Arrels, emplaçada “dins un centre vila insostenable”, èra saturada, amb mai de 30 escolans dins caduna de las siás salas e una lista d’espèra fòrça importanta per totes los nivèls educatius. Es per aquò que ja fa tres ans que reclamèron una solucion al Ministèri francés de l’Educacion, que, malgrat las reticéncias inicialas, se soldarà fin finala amb la dobertura d’un nòu centre.
 
La directritz de l’escòla actuala d’Arrels, Elena Gual, a qualificat l’anóncia d’“istorica”, pr’amor que “se podiá pas contunhar de trabalhar dins las condicions actualas”. Segon Gual, que poiriá ben èsser directritz del nòu centre per “aplicar l’experiéncia aquerida”, la dobertura d’una segonda escòla d’Arrels demòstra “que las causas càmbian” e que l’ensenhament en catalan dins las escòlas nòrd-catalanas a pas mai d’acarar l’oposicion sistematica de las autoritats educativas francesas, e mai se lo mot ‘immersion’ “encara fa paur”.
 
Nathalie Beaufils a explicat que se dobrirà lo periòde d’inscripcions escolaras aquesta setmana e que, coma dins las autras escòlas, se donarà prioritat a las familhas del quartièr del Vernet e, dins aquel cas en particular, tanben a las qu’an agut ensajat d’inscriure lors enfants a l’escòla d’Arrels sens capitar per manca de plaças. En foncion de la demanda que i aurà aquela primièra annada, s’estudiarà la possibilitat de dobrir mai de classas.
 
 
La preséncia del catalan a l’escòla creis
 
La nòva escòla d’Arrels serà la quatrena escòla immersiva en catalan de Perpinhan, après l’escòla actuala d’Arrels del centre de la vila e los dos centres de la Bressola: l’escòla del Vernet e la de Sant Galdric.
 
Lo president de l’Associacion Arrels, Pere Manzanares, a soslinhat qu’amb la nòva escòla d’Arrels, i aurà près de 1000 escolans a Perpinhan e mai de 2500 sus tot lo territòri qu’estudiaràn en catalan, una chifra “encara petita”, çò a reconegut, mas fòrça importanta se se pren en compte “quant a costat d’i arribar”. Tot comptat e rebatut, Manzanares planh que la demanda es totjorn fòrça mai nauta que l’ofèrta de plaças e que fòrça familhas pòdon pas escolarizar lors enfants en catalan; exactament çò meteis que çò que se passa amb l’occitan.