De Catalonha Nòrd al País Tolzan, aquesta dimenjada de Pentacosta vegèt unas bravas partidas tretzistas als plans internacional coma regional.

Encara verds, los Sèrbes
 
L’esquipa de Serbia èra venguda en autobús dempuèi Belgrad per afrontar l’esquipa de França a Sant Estève. Una esquipa dels Blaus compausada unicament de jogaires d’Elèit. Los vesitaires presentèron una còlha de masclasses, nharruts e adreits dins lo manejament de la pauma. A l’energia, tenguèron lo còp dins lo primièr temps: 18-2 pels Blaus. Mas, aprèp la pausa, poguèron pas res contra l’experiéncia e la rapiditat dels Pols, que portèron lor capital a 68 punts; los Roges capitèron de marcar un ensag en tota fin de partida: 68-8 al planchòt. Una simpatica fotografia dels Blaus e dels Roges mesclats clavèt la serada sus la pelena.
 
 
Los Dracs en estat de gràcia
 
Dissabte, la ventòrla senhorejava sus Brutus, mas foguèt un auragan que se desencadenèt sus la pelena catalana.
 
Aquò comencèt per la victòria dels juniors Dracs sul grop correspondent de Wigan: 28-26, amb una penalitat decisiva dels 50 mètres del Lucàs Albèrt.
 
Puèi, Wigan dobriguèt la marca per Charnley aprèp un temps de dominacion dels sang e aur! Mas Fouad Yaha replica sul pic, abans que Dureau lancèsse Gigòt, puèi Carney per Taia amb dos novèls ensags a la clau. Los Catalans se fan susprendre sus la remesa en jòc, mas anavan signar tres novèlas realizacions: Taia recupèra un còp de pè a seguir de Dureau jol nas de Cerièras e Blanc; puèi, Gigòt beneficia d’una pauma recentrada a la man per son alièr e, causa novèla, per Fouad Yaha, son los Dracs que marcan just sus la còrna. Coma Dureau ensacava las transformacions coma un metronòm (9 sus 10 dins la serada), los Dracs menavan 34-10 a la pausa.
 
A la represa, Wigan torna amb unas intencions que concretizan per Burgess. E foguèt tot pels Angleses: Oldfield fa son numèro de volteja per marcar al pè de la bandiereta, Taia i va de son tresen ensag de la vesprada; Escarré tusta a seguir per el, perseguís al pè e punta dins l’en-but; chistèra de Whitehead e tresena realizacion per Gigòt, designat òme de la partida (segonda partida per l’Avinhonenc jol malhòt sang e aur, que l’òm creiriá Drac de tota eternitat!). Lo public (plan nombrós: 10 500 espectators) dreit pica de las mans e ne vei pas los uèlhs: 58-16 al planchòt! Los Dracs se replaçan en seisena posicion al classament. Quand Carney pòt jogar sens problèma de santat... Bon, mas sèm en Super-Liga; cal confirmar sul pic: los Dracs rescontraràn Huddersfield, qu’es just davant eles al classament, aqueste dimenge a Newcastle, ont se ten la Dimenjada magica de la sason.
 
Per que la fèsta siá completa, senhalarem la victòria en XIII-fautuèlh de l’esquipa Dracs 54-20 sul Leyland Warriors, çò que ne fa los campions d’Euròpa de la disciplina!
 
 
Ferrals, campions de França del punt en aur!
 
Dimenge, se debanavan a Ramonvila las finalas dels campionats de Nacionala-1. En Grop B, l’esquipa locala menava lèu-lèu 20-0 e gardava l’avantatge 36-22 fàcia a Preissan-Lo Lauquet per joslevar lo bloquièr.
 
En Grop A, dins la finala audenca entre Ferrals de Corbièras e Vigalhenc-Aragon, los jogaires de Cabardés perdián lo menaire de jòc tre la primièra minuta sus nafradura. Ferrals menava a la pausa 12-8, mas una penalitat de Limongi dins la darrièra minuta del temps reglamentari metiá las doas formacions a egalitat: 22-22. Ne caliá passar per las prolongacions. A la 88a minuta, lo mesclanha de Corbièras, Sardà, ensacava la penalitat de la ganha: 24-22. En doas setmanas, la formacion de Corbièras ganha Copa Déjean e campionat, e cada còp al punt en aur: un tombat per la Copa, una penalitat pel campionat!
 
 
Lo primièr dels Estats d’Origina de l’an
 
La primièra de las tres confrontacions entre la Tèrra de la Reina (Queensland) e Nòva Galas del Sud se tendrà aqueste dimècres 27 de mai a l’ANZ Stadium de Sydney. Sus la pelena, se traparà la fina flor del moviment tretzista mondial.
 
 
 
 
Alan Roch