De dissabte a diluns, se debanèt a l’ancian aerodròm de Nisaç (Besierés) una rave party qu’a pas brica agradat al collectiu de proteccion del causse. Lo collectiu e los festaires se rescontrèron diluns, tanlèu la colèra passada, per dialogar. Amb d’explicacions e confrontacions expausadas d’un biais cortés, los amics de la natura se faguèron entendre, segon çò que rapòrta Midi Libre.
 
Los ecologistas reconeisson la correccion dels ravaires, e an constatat que “i aviá quitament pas un megòt” al sòl. Ça que la, “fa uèch ans que nos batèm per preservar aquel sit, e aquela intrusion l’avèm viscuda coma un viòl”, çò explica lo representant del collectiu Guy Abellanet. Planhon que la fauna e la flòra seràn tocadas e demandan als elegits del departament, “pr’amor que l’estat tròba pas cap de solucion”, que meta un terrenh a disposicion dels festenalièrs, “que prejudície pas degun”.
 
De lor costat, doas organizairas de la rave an reconegut qu'avián “envasit un terrenh sens autorizacion e qu’aquò es una cambada violenta... mas tot aquò es lo resultat de la pression de cèrts elegits que refusan la nòstra musica, la nòstra cultura, la nòstra enveja de pas intrar en boita de nuèch. Nosautres la musica la vivèm en plen aire”, çò explican en tot apondre qu’aiman e protegisson la natura.
 
Remembran tanben que lor enebiguèron de far la rave party a Cornelhan, tanben en Besierés. “Dins aquel afar, coma dins plan d’autres, cal far saber que nos possan a l’inegalitat. O aviam tot mes en òbra per èsser dins l’encastre de la lei. Nos an enganats”.
 
Diluns de matin, la justícia sasiguèt lo material de sonorizacion del festenal. Puèi de benevòls se metèron al trabalh en remassant las escobilhas daissadas sus plaça. Lo sit ara es totalament netejat.