Detenguèron ièr a Zuric (Soïssa) qualques dirigents de la FIFA, en seguissent l’òrdre de la justícia estatsunidenca, que n’a demandat l’extradicion per los jutjar per presumida corrupcion, segon çò que raportava ièr The New York Times. Son acusats de fraudariá, extorsion e emblanquiment d’argent pendent los darrièrs vint ans tocant l’adjudicacion de las sedenças de las copas mondialas de fotbòl e los acòrdis de marqueting e dels dreches televisius. Demièg los detenguts i a un dels vicepresidents del comitat executiu de la FIFA, Jeffrey Webb, de las Illas Caiman; un autre vicepresident, Eugenio Figueredo, d’Uruguai, e l’èx-membre del comitat Jack Warner, de Trinitat e Tobago.
 
Justament deman se deviá far las eleccions a la presidéncia de la FIFA, que Joseph Blatter i èra lo favorit a la reeleccion. A l’ora d’ara Blatter s’es pas vist tocat dirèctament per aquela operacion.
 
La majoritat de las detencions las faguèt ben d’ora de matin la polícia soïssa dins l’ostalariá Baur au Lac, als Alps, ont los caps de la FIFA celebravan lor reünion annuala. Après aver demandat las claus al portièr, los policièrs intrèron dins las cambras de l’ostalariá per far las detencions.
 
 

FIFA officials were escorted out behind sheets at the Baur au Lac hotel in Zurich http://t.co/LCuxIyugthpic.twitter.com/1M8SuQMSUu

— The New York Times (@nytimes) May 27, 2015