Ager dimenge se celebrèc un plen extraordinari deth Conselh Generau d’Aran entà hèr entrar deman dimars en Parlament de Catalonha eth debat dera naua Lei d’Aran que melhorarà er autogovèrn aranés, mès eth Plen non artenhec cap es vòts de besonh (tres cincaus parts). Abans de portar era lei en Parlament, es grops qu’intègren Conselh Generau d’Aran qu’acordèren tramitar-la a trauès d’ua ponéncia conjunta un viatge s’aurà melhorat eth capítol de finançament deth Conselh Generau.

Ère previst qu’eth Parlament de Catalonha inicièsse deman eth tramit de debat dera naua Lei d’Aran, mès abans calie que se tramitèsse coma ua iniciatiua parlamentària territoriau, ei a díder, que calie er acòrd deth Plen deth Conselh Generau d’Aran. Ei per açò que s’amassèc ager dimenge.
 
Totun, eth plen non artenhec cap es vòts de besonh, pr’amor qu’eth principau partit dera oposicion, Unitat d’Aran (UA), demanèc qu’era nòrma incorpòresse ua prepausa economica entà garantir er autogovèrn aranés. En aguest sens Francés Boya que demanèc era convocacion dera comission dera lei d’Aran entà “acordar entre toti un nau marc de finançament, pr’amor qu’entà nosati aguesta ei era clau entà qu’era naua lei sigue un succès”, ce diguèc eth pòrtavotz d’UA en un comunicat.
 
Deth sòn costat, eth sindic d’Aran Carlos Barrera, que declaraue ager en Catalonha Informacion que “mos trobaram representants des grops politics que configuram eth Conselh Generau d’Aran entà melhorar eth tèxte dera prepausa dera Lei d’Aran en àmbit deth finançament e quan i age consens entre toti nosati poder dar tramit parlamentari coma ponéncia conjunta dera naua Lei d’Aran”.
 
Alavetz, un viatge s’age melhorat eth capítol deth finançament, entre toti es grops politics representadi en Conselh Generau d’Aran, e damb er acòrd deth Plen, era naua Lei d’Aran que se presentarà a debat en Parlament de Catalonha.
 
Era actuau lei d’Aran qu'ei de 1990. B'ei fòrça de besonh ua revision e actualizacion der autogovèrn aranés en encastre dera comunitat autonòma de Catalonha e Aran.
 
 
 
 
Ferriòl Macip