En 2014, per las eleccions municipalas de l’estat francés, lo candidat de l’FN, Joris Hébrard, aviá obtengut al Pontet (Comtat Venaicin) la victòria amb solament 7 vòtes d’avança. S’èra contestada son eleccion pr’amor d’un problèma de signaturas dins lo registre dels electors. Per tant, lo 25 de febrièr, lo Conselh d’Estat aviá cancelat lo vòte, e caliá organizar una autra eleccion.

Entretant, lo cònsol d’extrèma drecha s’èra fach remarcar en creant una polemica: aviá volgut barrar l’accès als restaurants escolars a las familhas mai pauras. Puèi aviá assajat de se donar una cara sociala en prepausant la creacion d’una mutuala comunala.

Ansin, los electors d’aquela vilòta provençala de 17 000 estatjants tornèron a las urnas dimenge 31 de mai. Aqueste còp non se poirà pas contestar lo resultat. S’en 2014, lo 34 % dels sufragis èran anats al primièr torn a l’FN, en 2015 lo succès es net e clar: amb una participacion un pauc mai febla qu’en 1014 (lo 60%, cinc ponches de mens), la lista d’extrèma drecha recebèt mai del 59% del sosten popular. Per tant, las de sos adversaris, la de Jean-Firmin Badisa (sens etiqueta) e la de Caroline Joly (Los Republicans), poguèron pas empedir la reeleccion del cònsol FN, tre lo primièr torn d’escrutini. Los ancians adversaris de Sénher Hébrard, Claude Toutain (UMP) e Miliani Makhechouche (PS), avián apelat a una lista unica per combatre l’FN, mas de badas.

Se refortís doncas l’implantacion de l’extrèma drecha francesa dins aquela zòna d’Occitània, long del Ròse.