Eth Sindic d’Aran, Carlos Barrera, que reaccionèc damb contundéncia deuant deth blocatge, des dus partits dera oposicion, Unitat d’Aran (UA) e eth Partit Renovador d’Arties e Garòs (PRAG) e les acusèc de “manipular mediòcrament entà favorir es interèssi personaus e de partit en detriment des interèssi generaus deth país”.

Atau coma Jornalet ac publicaue agèr, calie qu’eth plen deth Conselh Generau balhèsse era autorizacion dimenge passat ara tramitacion dera naua lei d’Aran en Parlament de Catalonha, mès era prepausa non auec cap es tres cincaus parts des vòts de besonh e demorèc paralizada en tot demorar-ne eth melhorament des aspèctes de finançament. En aguest sens, entà amiar entà deuant era prepausa èren de besonh 8 vòts sus 13, mès solament compdèc damb es 7 vòts de Convergéncia Democratica Aranesa (CDA), eth partit que lidere Barrera.
 
Segontes çò que Barrera expliquèc ager a Jornalet, “coma sindic e coma aranés creigui qu’er argument deth finançament ei ua excusa entà hèr impossible qu’era Lei d’Aran auance”. En aguest sens, eth debat falhit de dimenge siguec, segontes era sua opinion, “ua grana oportunitat perduda entà fixar e ancorar eth futur der autogovèrn d’Aran”. Segontes eth sindic, es arrasons pressupostàries e financères èren ua “excusa” pr’amor que considère que “damb eth redigit deth document en capítol economic es critèris aurien permetut de garantir un finançament sufisent entath Conselh Generau d’Aran”. Barrera ahigec que pendent era tramitacion parlamentària dera futura lei tot aurie estat tornat a debàter, includit er apartat de finançament, per aquerò non compren perqué ac cau tornar a debàter en Conselh Generau.
 
Barrera qu’arrebrembe qu’aguesta prepausa compdèc damb eth supòrt unanim de toti es estaments politics dera Val, donques que non solaments se redigic en Conselh Generau mès que compdèc damb aportacions de toti es municipis per mejan dera nomentada “taula de Betren”.
 
Era futura Lei d’Aran que comencèc ja eth sòn tramit en Parlament de Catalonha pendent era legislatura precedenta, mès es naues eleccions, que provoquèren un cambiament de govèrn ena Generalitat, be heren qu’eth procès tornèsse a començar. En aquera escadença se decidic qu’eth començament deth tramit siguesse pera via legislatiua comarcau e non pas en ponéncia conjunta, çò que vò díder qu’ei de besonh ua majoritat de tres cincaus parts deth Conselh Generau.




Jaume Clotet