Se debana uèi una jornada de mobilizacions en sosten a la cauma de la fam que lo conselhièr regional Dàvid Grosclaude ten dempuèi uèch jorns. Los elegits del Partit Occitan (PÒC) Guilhèm Latrubesse, Gustau Aliròl e Arvèi Guerrera an anonciat una accion simbolica de 24 oras de cauma de la fam davant los ostals de region a Tolosa, Clarmont-Ferrand e Marselha respectivament, e los sostens se multiplican. Al delà d’aquelas tres vilas, se son anonciats de junis e d’acamps de protèsta davant qualques vilas d’Occitània, dont a Aush davant la comuna e a Pau a la Plaça Reiau. E mai a l’ostal de region a Bordèu, ont Grosclaude mena a tèrme son accion.


Lista de recampaments
   
Deman los collègas del PÒC vesitaràn lo caumaire a l’ostal de region de Bordèu, acompanhadats de José Bové, Noël Mamère, François Alfonsi e d’autres elegits. Dimars passat èran ja 150 los elegits que sostenián Grosclaude e lo sosten popular arriba d’Occitània tota, tanben d’Aran, e tanben de Bretanha, lo Bascoat, Catalonha e de pertot.
 
Amb son accion frapanta, Grosclaude denóncia l’inaccion de l’estat francés tocant la creacion de l’Ofici Public de la Lenga Occitana (ÒPLO), un projècte votat a l’unanimitat en junh de 2014 per las assembladas regionalas d’Aquitània e de Miègjorn-Pirenèus. Segon çò que podèm legir dins son blòg, sa santat va plan e beu çò que cal, en seguissent de conselhs d’especialistas.
 
 
 
 
 
 

---

Peticion en linha
 
Sosten sus Facebook
 
Sosten sus Twitter
#mespresats tuits