Los referendums consultatius dependon de la decision del Tribunal Constitucional. Zaia reclama de los celebrar “immediatament”. Lo programa del candidat de la Liga Nòrd met l’accent sus l’autonomia e non pas sus la secession. L’independentisme explicit supèra lo 5% dels vòtes e atenh lo melhor resultat de l’istòria.

Luca Zaia (Liga Venèta-Liga Nòrd) ganhèt dimenge la majoritat absoluda a las eleccions presidencialas e legislativas de Venèt. Lo candidat liguista e actual president de Venèt obtenguèt lo 50,1% dels vòtes en l’eleccion presidenciala, del temps que dins la legislativa las candidaturas que lo sostenián atenguèron lo 52,2% dels sufragis, e auràn 28 dels 49 sètis del conselh regional. D’aqueles 28, 13 seràn per la Lista Zaia, 10 per la Liga Nòrd, 3 per Forza Italia, 1 per Independenza Noi Veneto e 1 per Fratelli d’Italia.
 
Tre qu’es estat reelegit, Zaia a avertit que lo govèrn italian se deu sèire amb el “per parlar d’autonomia”. E a insistit sus la promesa contenguda dins son programa electoral: “Volèm que se faga sus lo còp lo referendum per l’independéncia e l’autonomia”, çò a dich. Se tracta de dos vòtes desparièrs, aprovats pel conselh regional en 2014 e suspenduts preventivament per la Cort Constitucionala, qu’a pas encara decidit se son legals.
 
Lo programa de Zaia conten pas cap d’engatjament per l’independéncia al delà de far lo referendum consultatiu. Lo president reelegit a mes l’accent sul besonh d’evitar que la reforma constitucionala italiana —a l’ora d’ara en cors— traga de competéncias a Venèt. E, en tot cas, l’escomesa mai repetida per Zaia dempuèi las annadas passadas es que Vènet dispause d’una autonomia engrandida dins Itàlia, siá en tot venir la seisena region amb autonomia especiala, siá autrament.
 
 
Los partits explicitament independentistas supèran lo 5%
 
Al delà de la Liga Nòrd —que naviga entre lo federalisme e un independentisme amb data non fixada—, los partits explicitament independentistas que se presentavan a las eleccions de Venèt an obtengut l’eveniment istoric de superar lo 5% dels vòtes. Es lo primièr còp qu’aquel sector obten un resultat coma aquò.
 
Ça que la, la division en tres listas supausa qu’obtendràn solament un conselhièr regional dels 49 que s’elegissián. Serà Ilaria Padoan, elegida dins la lista Independenza Noi Veneto, una coalicion de divèrses partits independentistas que sostenon Zaia. Independenza Noi Veneto a obtengut lo 2,7% dels vòtes, un pauc dessús lo 2,5% qu’a obtengut Indipendenza Veneta, que presentava Alessio Morosin coma presidenciable. Fin finala, Veneto Stato-Razza Piave a obtengut lo 0,2% dels vòtes dins de la lista de centredrecha de Flavio Tosi.
 
Indipendenza Veneta e Veneto Stato-Razza Piave demòran en defòra del conselh regional.
 
 
 

 

---

Aquesta nòva es adaptada de Nationalia amb qui Jornalet a un acòrdi de cooperacion