Diluns de ser se suicidèt Jean Roujon, èx-cònsol de Maruèjols (Marjarida), segon çò que raportavan Lozère Nouvelle e Midi Libre. Se tracta d’un drama que poiriá metre al debat l’isolament dels elegits rurals, coma ben o soslinha Libération.
 
Fa doas setmanas, lo nòu cònsol de la vila, Jean-François Deloustal, aviá revelat que la vila, d’aperaquí 5000 abitants, es endeutada de tretze milions d’èuros e en cessament de pagament.
 
Abans de se suicidar, Roujan aviá declarat a Lozère Nouvelle qu’el èra un “òme ferit e embrutit”. Dins una letra ja mandada a aquel jornal, soslinhava los chepics que li causavan “las bassas dotacions” e que li calguèt far de “causidas politicas budgetàrias fòrtas”, coma elegit, “malgrat los marges de manòbra limitats”. Roujon remarcava sos “19 ans consagrats” a la vila amb “onestat e integritat al contacte dirècte dels maruegencs”. E mai, segon lo procuraire del departament de Losera (çò es, de Gavaudan), an trobat doas letras de l’èx-cònsol trespassat. Dins una d’ela auriá escrich “Soi pas un nèrvi” (“Je ne suis pas un voyou”).