Lo conselhièr regional d’Aquitània Dàvid Grosclaude o escriguèt dins son blòg ièr de ser: renóncia a sa cauma de la fam. Aviá recebut d’efièch, a 19h30, una letra que la signavan las ministras francesas de l’educacion e de la cultura, e que li anonciava la creacion oficiala de l’Ofici Public de la Lenga Occitana (ÒPLO) “abans la fin de l’estiu”. Dàvid Grosclaude precisa que, gràcias a la mobilizacion de totes, l’estat “participarà au son foncionament e au son finançament a costat de las regions”.
 
Per festejar la victòria, apèla totes los que i an participat a venir dijòus 4 de junh a 16h30 davant lo conselh regional d’Aquitània.
 
Se pòt dire que la cauma de la fam de Grosclaude, de mai d’una setmana, a fach espelir en Occitània, amb de sostens internacionals, un movement de revòlta pacifica e solidària organizat jos l’eslogan “N’i a pro d’èsser mespresats”. L’eslogan faguèt lo torn d’Internet e dels rets socials, sovent amb las fotografias de caras d’occitanistas de divèrsas sensibilitats e d’amics de la causa occitana. Lo 3 de junh, s’organizèt una jornada de mobilizacion, e una compatriòta, Evalina Houlès, decidiguèt de far ela tanben una cauma de la fam.
 
“Que demoran fòrt de combats a miar. Qu’avem provat que n’avèvam la capacitat”, çò escriu Dàvid Grosclaude. Se lo movement dels Mespresats anóncia lo temps de l’unitat de l’occitanisme?

Recordem, per exemple, la manifestacion per l’ensenhament de l’occitan qu’aurà luòc a Peireguers dissabte 6 de junh.