Fòrça exemples demòstran que las guèrras pòrtan tòrt, tanben, al patrimòni istoric. L’incendi de la bibliotèca d’Alexàndria, l’obsession dels nazis cap a “l’art degenerat” que volguèron escafar per totjorn, la destruccion pels talibans dels monumentals bodas de Bamian en Afganistan e, mai recentament, l’atac sistemàtic de l’Estat Islamic contra las preciosas òbras d’art presentas sul territòri qu’envasisson. Per luchar contra aquestas destruccions, maitas iniciativas prepausan de recórrer a las estampadoiras 3D per reproduire las pèças degalhadas de manièra collaborativa.
 
Qualques una d’aquelas iniciativas, las explica l’article “ISIS vs. 3D Printing“ (Estat Islamic contra estampatge 3D), signat per Ben Valentine al portal Motherboard. S’i parla, per exemple, de’ (Especulacion Materiala: Estat Islamic), un programa lançat per l’artista e activista iraniana Morehshin Allahyari: a travèrs d’una recèrca aprefondida, s’esfòrça de modelar e de reproduire d’estatuas destruchas ongan per l’Estat Islamic, dont fòrça dins de musèus de Mossol.
 
Es justament per respondre a la destruccion d’art dins aquela importanta vila del nòrd d’Iraq, ocupada per l’Estat Islamic despuèi lo 10 de junh de 2014, qu’a espelit una autra iniciativa, Project Mosul (Projècte Mossol), jos  la responsabilitat de Matthew Vincent, de Chance Coughenour e de Marinos Ioannides. L’objectiu e lo metòde de trabalh son parièrs als de Morehshin Allahyari: partejar d’imatges numerics del patrimòni cultural e istoric atacat per l’Estat Islamic, per tal d’ensajar de lo tornar bastir amb de còpias exactas en tres dimensions.