Nadine Pothier es una artista tolosana installada a Montalban dempuèi 1993, ont ensenha dins son talhièr lo dessenh, la pintura de l’òli e l’acrilic.
 
Pendent sièis ans demorèt a Bordèu ont estudièt a l’Escòla de las bèlas arts e a l’Universitat Montanha de Talença. “Aquela formacion m’a permés de me «destacar» de la pintura classica e de la «forma» en general, per un trabalh mai personal virat vèrs la matèria, l’emocion, çò de ressentit”, çò ditz.
 
De fach, las darrièras creacions de l’artista occitana daissan una plaça importanta a la transparéncia qu’es venguda lo mot mèstre de son trabalh. Aquela transparéncia es obtenguda amb l’ajuda de diferentas texturas de papièrs, de superposicions, de tecnicas d’aqüarèlas, de projeccions d’aiga, de coladuras, de pigments divèrses...
 
E mai, “en desirant d’anar al delà d’aquela transparéncia”, sas recèrcas artisticas actualas s’orientan vèrs un trabalh sul veire e lo plexiglàs.