Lo 28 de mai passat, se debanèt lo Jorn del Patrimòni al Collègi Carnot de Grassa. Se tracta d’un projècte dirigit per Na Clementina Comte (professora de mentonasc als collègis Maurois e Vento de Menton) e Na Nadèja Velez (professora de provençal al collègi Carnot de Grassa).
 
Pendent un an, los escolans de l’opcion de provençal del Collègi Carnot de Grassa e los de l’opcion de mentonasc dels collègis Maurois e Vento de Menton entretenguèron una correspondéncia ont se presentèron (identitat, familha, passion...), ont presentèron lors establiments, lors vilas amb lors fèstas celèbras (Fèsta del Limon per Menton e Fèsta del Gensemin per Grassa). A la fin d’aquela correspondéncia, organizèrem un rescontre entre los tres establiments pendent un Jorn del Patrimòni al Collègi Carnot de Grassa, a l’entorn de quatre talhièrs: cosina amb la realizacion del celèbre pan banhat, balèti e descobèrta de las danças tradicionalas de la region, jòc amb un lòto sus las partidas del còrs uman e vidèo amb la projeccion del dessenh animat en lenga nòstra Lo Grufalò. 
 
De matin, los escolans mentonasques ne profechèron per vesitar la vila de Grassa e la perfumariá Fragonard que n’a fach sa reputacion. D’aprèsdinnar, los escolans grassencs descobriguèron lors correspondents e faguèron coneissença a l’entorn de quatre talhièrs animats per de benevòls de l’IEO 06, Carlòta Rubini, Patrícia Funghini e Marido Maire. La jornada s’acabèt per un vespralh amb la degustacion dels pans banhats… un regal!
 
La tòca d’aquela jornada èra d’expausar los escolans dins la practica de la lenga amb d’escambis en lenga nòstra entre eles e amb de professionals de la lenga e de la cultura regionalas. Avèm volgut mostrar als escolans que l’occitan es pas una lenga mòrta e que se practica encara en defòra de l’espaci de la classa. Caliá far descobrir lo patrimòni cultural de la region (danças tradicionalas, recèpta del pan banhat) e subretot mostrar l’importància de l’intercompreneson entre los diferents dialèctes de l’occitan (aquí lo provençal e lo mentonasc).
 
Los professors responsables del projècte, Na Velez e Na Comte, tenon a mercejar los collègis Carnot, Maurois e Vento per lor sosten constant a la lenga e la cultura occitanas. Uèi, a l’ora de las reformas que tòcan dirèctament l’ensenhament de las lengas regionalas, son e demòran los detentors de la salvagàrdia de la lenga occitana. Un grandmercé tanben a l’IEO 06 per sa participacion e son implicacion dins lo projècte pendent aquesta annada. 
 
 

 
Nadège Velez

---

Nice Matin: Des collégiens Grassois et Mentonnais réunis autour de la culture occitane