An manifestat aqueste dissabte 6 de junh per charrieras, a Peireguers, per revendicar l’occitan a l’escòla, au collègi e au licèu. L’organizacion nos manda un resumit de l’eveniment que publicam en seguida.

Dissabte de matin 280 personas venguèron manifestar a Peireguers, en Peiregòrd, per cridar lor colèra fàcia a un Ministeri de l’Educacion Nacionala qu’enquèra un còp eissaia de far desparéisser l’ensenhament de l’occitan demest la novèla reforma daus collègis. Subretot la mobilizacion se fasiá per veire mantenguda l’opcion en classa de seisesma e son retorn per las classas tecnologicas de licèu.
 
Lo passacharriera foguèt pro simpatic e i fau notar una preséncia fòrta de liceans e de collegians acompanhats de lors parents. Las Calandretas de Peiregòrd èran quí tanben e ben representadas, coma las escòlas bilingüas publicas. La manifestacion organizada per un collectiu qu’amassa 47 associacions mòstra aumens que dins queu país de crocants, i sabon far l’unitat dins la lucha coma a taula!
 
Una delegacion foguèt recebuda per lo director de gabinet dau prefècte. De queu rescontre ne ragèron doas chausas que son de bonas dralhas de reflexion:
   
Quò es una avançada donc per rapòrt a çò que respond lo ministèri dempuei un mes aus deputats e senators. Fau contunhar de butir e enquèra butir mas, se los peiregòrds son suaus, son tanben mas pacients e laissaràn pas l’afar entau. E se la mobilizacion foguèt bona queu dissabte, sabon plan que i mancava dau mond e que poirà èsser ben mai importanta lo còp que ven.
 
 
 
Marçau Peyrouny

---

Fòtos de la manifestacion