Dempuèi aqueste dimenge passat, e fins al 20 de junh, las comunicacions entre los centres de contraròtle de la NASA e los cinc aparelhs que son en orbita o sus la superfícia de Mart se pausan per doas setmanas. Lo Solelh n’es la causa, pr’amor que pendent aquelas doas setmanas s’interpausa entre las doas planetas e n’afècta las radiotransmissions. Las tres sondas e los dos veïculs tot terren que l’agéncia espaciala ten sus la Planeta Roja salvaràn dins lors ordenadors las donadas scientificas qu’amassen pendent aqueles jorns, puèi las mandaràn a la Tèrra quand la conjoncion planetària serà passada.
 
En seguida de las interferéncias que causa lo Solelh a las transmissions pendent la dicha conjoncion de Mart, que se debana aperaquí cada vint e sièis meses, l’agéncia espaciala estatsunidenca s’estima mai d’arrestar las comunicacions amb los aparelhs espacials e, aital, vòl evitar de metre en perilh lo sistèma de comunicacion de las missions.
 
A l’ora d’ara la NASA a tres sondas que viran dins l’orbita de Mart: Mars Odyssey dempuèi 2002, Mars Reconaissance Orbiter dempuèi 2006 e Maven qu’arribèt en setembre passat. E mai, i a dos veïculs robotizats que son a percórrer la superfícia de la planeta: Opporunity dempuèi 2004 e Curiosity dempuèi 2012.
 
 

---

Mai d’informacions sus las missions espacialas vèrs Mart: jornalet.com/etiqueta/mart