La Gàrdia Costièra italiana e de membres de la fondacion MOAS an salvat aquesta dimenjada passada aperaquí quatre mila personas en nauta mar, dont la majoritat d’origina eritrèa, qu’èran dins un vintenat de barcas al sud de Sicília. L’operacion se poguèt menar a tèrme gràcias a las telefonadas de destreça que los gardacòstas an recebut via satellit.
 
Un primièr grop d’immigrants, d’aperaquí a tres mila cinc cents personas, foguèron salvats dissabte. Èran dins nòu barcassas e sièis canòts pneumatics, a quaranta milas de la còsta de Libia. A l’operacion de salvament participèron tanben tres vaissèls de las armadas alemanda e irlandesa, qu’èran dins la zòna.
 
Ièr, amb l’intervencion d’una fregata britanica, se salvèt mièg milierat de personas qu’èran dins quatre barcas precàrias.
 
Dempuèi lo començament de l’an òm a pogut salvar gaireben cinquanta mila personas dins aquela zòna de la Mediterranèa: aquelas operacions que se son menadas près de la còsta italiana. Aquò es un 12% de mai a respècte del meteis periòde de 2014, segon l’ÒNU.