D’un ponch de vist general, l’ensenhament de la lenga e de la cultura occitani en l’Acadèmia de Niça (departaments de Var e dei Aups Maritimi) es en plen desvolopament. Son pamens de 10 establiments escolari  dau segondari qu’an conoissut la dubertura d’aquest’ensenhament despí 3 ans embé una creissença de 50% dau nombre de professors en lo meme temps (24 professors certificats au total).
 
Tot aquò, lo devèm en promier à la presença de la nòstra matèria en lo Plan Acadèmico de Desvolopament 2010-2014 vorgut per lo Rector Christian Nique. Ancuèi, lu pichoi de l’Acadèmia de Niça an la possibilitat de segre una formacion en lenga nòstra tra lu 11 licèus dau departament dei Aups Maririmi e lu 6 licèus dau Var que prepausan aquel ensenhament,  ma tanben en lu 12 collègi de Var e lu 17 dei Aups Maritimi que lo fan parièr. Aquela dinàmica fa que podèm cuntar 1700 escolans dau segondari qu’imparan la lenga d’òc.
 
Pura, la situacion dau primari es un pauc manco joiosa. D’efet, li son que sièi Professors dei Escòlas qu’acapitèron lo concors especial de lenga d’òc ma que si retrovan sostenguts da 60 autres professors dei escolas originaris dei doi despartaments concernats e que si bolegan per faire vieure un’iniciacion e una sensibilisacion à l’Occitan ai sieus escolans. La « cerièia sus lo pastisson », coma si ditz en francès, torna a la soleta escòla bilinga de l’Acadèmia e que si tròva à Cuers (Brinholenc).
 
Cau pas denembrar que toi aquelu ensenhaments permeton de faire espelir totplen de projects embé d’autri instanças, embé la populacion locala o embé de partenaris fòra de l’Educacion Nacionala. Meme se lo camin es encara lònc, esperam que duresse…




Olivier Pasquetti
President de l’Associacion dei Professors dei Lengas Regionali de l’Acadèmia de Niça