Actualitats
L’occitanista Jan Moreu es mòrt
Segon d’informacions de La Setmana, l’èx-director de l’IEO auriá patit un accident en montanha
L’occitanista Jan Moreu es mòrt a causa d’un accident en montanha, segon d’informacions de La Setmana. Aviá trabalhat per la seccion de Cantal de l’Institut d’Estudis Occitans (IEO), un organisme que puèi ne foguèt director federal. Recentament èra l’encargat de mission al près de la region d’Aquitània per l’Ofici Public de la Lenga Occitana (ÒPLO).
Lo conselhièr regional Dàvid Grosclaude a publicat la trista nòva dins son blòg. “Lo men amic que s’ei mort”, çò ditz Grosclaude, en tot soslinhar lo trabalh menat a tèrme per Moreu. “Lo tribalh tranquil d’aqueth òmi —qu’anavi díser gojat pr’amor que’u conegoi que n’èra enqüèra— qu’esconèva ua impaciéncia que li arribava d’exprimir, mes tostemps dab tranquillitat. Qu’èra l’impaciéncia deu qui sabèva que lo tribalh per la lenga aperava l’urgéncia; impacient mes jamei emmaliciat, impacient mes jamei desesperat”, çò remarca en tot nuançar que “shens eth non i averé pas avut la prumèra manifestacion de Carcassona en 2005”.
De son costat, Anna-Maria Poggio, del burèu de l’IEO federal, a remembrat las annadas passadas a son costat. “L’occitanisme pèrd un amic e un militant de tria”, çò a dich Poggio.
Lo conselhièr regional Dàvid Grosclaude a publicat la trista nòva dins son blòg. “Lo men amic que s’ei mort”, çò ditz Grosclaude, en tot soslinhar lo trabalh menat a tèrme per Moreu. “Lo tribalh tranquil d’aqueth òmi —qu’anavi díser gojat pr’amor que’u conegoi que n’èra enqüèra— qu’esconèva ua impaciéncia que li arribava d’exprimir, mes tostemps dab tranquillitat. Qu’èra l’impaciéncia deu qui sabèva que lo tribalh per la lenga aperava l’urgéncia; impacient mes jamei emmaliciat, impacient mes jamei desesperat”, çò remarca en tot nuançar que “shens eth non i averé pas avut la prumèra manifestacion de Carcassona en 2005”.
De son costat, Anna-Maria Poggio, del burèu de l’IEO federal, a remembrat las annadas passadas a son costat. “L’occitanisme pèrd un amic e un militant de tria”, çò a dich Poggio.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Veni d'aprener la trista, estonanta nòva de la mòrt de Jan Moreu. L’aviu coneissut en un viatge en Martinica ental 2004: jove occitanista de granda rigor professionala, sabia escotar, aimava refleter mas decò agir. Lhi agradava chantar e lo naviso orguelhós de far resonar, al de lai de l’Atlantic, lo nòstre repertòri de chançons. Era estat en Val Maira e Varacha emè sa familha ental 2010, per conoisser decò aqueste cant d’Occitania. Precìs, umil e pausat, mas ponchut e vivaç, avia sabut donar de conselhs per la defensa e promoccion de l’occitan decò a nosautres des valadas.
Penso que l'occitanisme avia encara manca de nele, mas mai que mai n'en aurien agut las sias mainaas, e tota la sia familha.
A reveire, Jan
Ai aprengut la meschanta novèla emb beucòp de pena. Sabe pas que dire, gardarai lo suvenir de quauqu'un de plan professionau, discret e avenent. Bon viatge l'òme.
Lo comunicat de l'IEO :
L’Institut d’Estudis Occitans es de dòu !
Jan Morèu nos a quitat, diluns, que la montanha l’a culhit dins la flor deis ans e la paraula nos manca tant sembla derisòria per dire l'esmoguda e la pena gròssa que nos aclapa an aquesta novèla tant trista e injusta.
A l'IEO, oblidarem pas toteis aquesteis annadas viscudas de cotria a trabalhar per l’espandiment de « l’idèia occitana ». Oblidarem pas tota l’òbra complida detz ans de temps coma promier director qu’aguèt tot d’inventar, çò qu’èra pas una sinecura.
Oblidarem pas ton sorire tranquille, ton plaser tre que se metiam a cantar…
L'occitanisme perde un amic e un militant de tria...
Una pensada per lei tieus e teis enfants.
Lo tristum nos aclapa.
Adieu l’amic.
Ana-Maria Poggio, VP de l'IEO
De son costat, l'IEO-Aude pòt pas doblidar la part bèla que prenguèt a la capitada de la manifestacion de 2005.
La FELCO avèm d'ans de temps agut l'occasion de trabalhar amb Joan MOreu, per la preparacion de las premieras manifestacions Anem oc. Ne gardo lo record d'un ome de granda qualitat umana, e duna intelligéncia rara, coblaa amb un realisme utile per l'accion. Sa mort, tant jove encara, me fai personalament grand pena. Nostra co-segretària, Maria-Joana Verny a reagit tre ièr. La FELCO saluam la memoria dau grand militant que foset Joan Moreu.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari