Lo primièr ministre francés, Manuel Valls, remborsarà a l’estat los 2500 èuros per las despensas de son assisténcia a la finala de la Liga dels Campions de fotbòl entre la Juventus e lo Barça, qu’es estada motiu de criticas. Sa preséncia dins aquel eveniment esportiu a generat de criticas, sustot de l’oposicion, que li retrason un usatge interessat de l’avion oficial e una despensa innecessària d’aperaquí 14 000 èuros. Denóncian que Valls se desplacèt a Berlin coma suportaire del Barça.
 
Segon lo govèrn francés, Valls foguèt convidat pel president de l’UÈFA, Michel Platini, e, en mai d’aquò, aviá prevista una reünion amb los caps del fotbòl europèu per parlar de l’Eurocopa 2016 que se jogarà dins l’estat francés. Totun, aquela reünion es pas estada una rason sufisenta per calmar las criticas.
 
Ara Manuel Valls a ensajat d’adocir las criticas. Dins son viatge a l’illa de la Reünion, anoncièt ièr que remborsariá a l’estat 2500 èuros que correspondon a las despensas de viatge de sos dos enfants. Lo primièr ministre insistiguèt que se tractèt d’un “desplaçament oficial” mas tanplan a volgut èsser “sensible a la reaccion dels franceses”, çò rapòrta Le Figaro.