Dimars venent, en ocasion dera Hèsta d’Aran, se presentarà en Barcelona eth roman istoric Òc en Musèu d’Istòria de Catalonha. Er eveniment, organizat peth Musèu, eth CAÒC e Jornalet, compdarà damb era participacion de Griselda Lozano, autora deth roman; er occitan Jusèp Boya, director deth Musèu d’Istòria de Catalonha; Joan Cardona deth CAÒC; e eth capredactor de Jornalet Ferriòl Macip.
 
Er eveniment se debanarà eth dia 16 de junh entàs 18h en Musèu d’Istòria de Catalonha, plaça de Pau Vila, 3, a Barcelona.
 
 
 
 
FM
 

fffff		fffff
	Lo roman Òc   Òc explica l’istòria d’una escrivana que cèrca de documents del sègle XII per escriure un roman istoric sus la Batalha de Murèth. E mai se cèrca dins los archius de la Corona d’Aragon a Barcelona, e quitament dins los archius del Vatican, es dins una bibliotèca d’Aran, e gràcias a un curat aranés occitanista, que descobrirà la passionanta istòria d’un gojat del sègle XII. Mas la recèrca de la protagonista, ajudada per un scientific finés, serà plena de suspens, de mistèris e tanben d’amor, de coneissenças e d’esperitalitat.   Gràcias a aquela engenhosa dobla narraccion que fa viatjar lo lector entre un relat a nòstra epòca e un manuscrit autobiografic d’un prèire del sègle XII, lo roman articula estrechament l’Aran actual amb tota Occitània, nòstre present occitan amb l’edat d’aur de nòstra civilizacion, sovent illustrada per de citacions poeticas medievalas. L’autora sap susprene lo lector en far variar la psicologia, las emocions, los tons e lo ritme, e accelèra l’intensitat dramatica a la fin, d’a fons inesperada, del roman, que supausa una seguida.   Es de soslinhar la rigor istorica de l’òbra, e la divulgacion que fa de l’importància d’Occitània al sègle XII. Es alavetz qu’aqueste país portèt tota la sciéncia en Euròpa, la dels classics e la dels arabis. Lo roman Òc mòstra las valors d’un país tolerant ont las femnas son importantas, ont se permet una eretgia que faguèt trebolar Roma, ont se parlava de convivéncia e de paratge, ont s’inventèt l’amor cortés, e que los manuscrits produches dins sos scriptoria difondián las arts e las sciéncias per Euròpa tota. Es benlèu pr’amor d’aquò que lo roman Òc foguèt definit per la delegacion finlandesa de la Fièra del Libre de Francfòrt coma “un roman istoric que cambiarà l’istòria”.

fffff		fffff
	La Fèsta d'Aran Aran festeja cada 17 de junh sa fèsta nacionala. La data marca la reïnstauracion del Conselh General d’Aran, es a dire, aquest organisme per lo govèrn del país que foguèt restaurat en 1990 après 156 ans d’inactivitat, e qu’es refortit ongan amb la nòva Lei d’Aran. Es integrat per tretze conselhièrs, dont un es elegit coma sindic d’Aran.   Definís aquel autogovèrn la lei d’Aran, que legifèra los organs del Conselh General d’Aran, lo foncionament, lo regim electoral, lo drech civil aranés, l’organizacion del territòri, las politicas d’egalitat, l’educacion, las infrastructuras, la seguretat, la santat, etc. Se definís tanplan las relacions del Conselh General d’Aran amb lo govèrn e lo Parlament de Catalonha, e lo finançament per far possible tot aquel autogovèrn.