Spotify e Deezer an un concurrent nòu. Lo president d’Apple, Tom Cook, presentèt a la dobertura de la Worldwide Developers Conference de San Francisco (Estats Units) un servici nòu de la societat californiana nomenat Music, que cèrca de s’impausar plan lèu dins lo mercat de la musica en streaming pagadís.
 
Aquel Apple Music qu’òm esperava dempuèi longtemps es un gigantàs catalòg de cançons disponiblas a partir del 30 de junh, per 9,99 dolars mesadièrs. Lo servici serà dispobible dins un centenat de païses. Se prevei tanben una tarifa familiala, de 14,99 dolars per mes, que permet de crear fins a sièis comptes en parallèl.
 
Desvolopat amb la societat Beats Electronics, una entrepresa crompada per Apple arunan per tres miliards de dolars, lo nòu servici espèra de despassar en pauc temps los 100 milions de clients e avançar los principals servicis similars qu’avèm a l’ora d’ara, es a dire coma çò que porgisson lo suedés Spotify —qu’a 10 milions d’usatgièrs que pagan— e lo francés Deezer —que n’a sièis milions—. Per aténher aquò se prepausa d’ofrir un periòde s’assag gratuit de tres meses e, sustot, de ne far de publicitat dins la granda basa d’un miliard de clients qu’Apple ja possedís dins son servici iTunes. De mai de mai, Apple Music prevei d’ofrir una version pel sistèma operatiu Android de Google dins la davalada que ven.