Libération publiquèt dimars passat sul sieu sit Internet los escambis entre Mohammed Merah e la polícia al moment del sètge del sieu apartament a Tolosa.

Libération assegura qu’a publicat la totalitat de las convèrsas, ont lo brigadièr Hassan ensaja de comprene tot çò que li a escapat quand es estat enganat pel jove islamista a prepaus dels sieus viatges, al moment de la lor amassada lo 14 de novembre de 2011, e a l’encòp ensaja d’aprene totas las informacions “operacionalas” que pòt.
 
Mohamed Merah explicava que seguissiá un objectiu precís en la causida de las siás victimas, segon las convèrsas amb la polícia al moment del sètge, los 21 e 22 de març, segon las 173 paginas que lo jornal francés Libérationa publicat sul sieu sit web.
 
Lo quotidian explica dins la siá edicion papièr qu’aguèt accès a las retranscripcions de quatre oras d’aquelas convèrsas, e que n’a causit los “passatges mai bracs”. Lo 8 de julhet, la television francesa TF1 aviá ja difondut los principals enregistraments d’aquelas convèrsas.
 
Segon çò qu’a publicat lo jornal, Merah aviá un objectiu precís dins la causida de las victimas. Ditz qu’auriá jamai tuat d’enfants “se vosautres aviatz pas tuat nòstres enfants”, e fa referéncia als innocents mòrts en Palestina.
 
Quant als militars, ne justifica la mòrt per la preséncia de l’armada francesa en Afganistan, tostemps segon çò qu’a publicat Libération.
 
Merah parla tanben de la siá conversion a l’islam, lo 18 de febrièr de 2008, quand èra en preson e condemnat a 18 meses per un autre afar. Foguèt liberat en 2009 e en 2012 partiguèt en Argeria per venir mujahidin, çò que foguèt complicat. Per aquò s’engatgèt a la Legion Estrangièra, per anar en Afganistan e “tornar l’arma contra los legionaris e jónher los talibans”. Merah parla tanben del sieu estatge en Siria “per trobar dirèctament los mieus fraires”, e passa de contunh en Liban, en Turquia.