Los Sarrasins: lo principal del Collègi Jean de Prades, Eric Soula, ven de far dintrar Occitània dins son establiment. A l’iniciativa de dos professors: Jiròni Frare, qu’es professor d’occitan, e Thierry Tomezak, professor de tecnologia, los escolans de las classas d’occitan de cinquena, quatrena e tresena coma aqueles de tresena de DP3 (descobèrta professionala) cambièron la senhaletica tota de las pòrtas dels burèus e de las salas de classa en tot i portar de plaquetas en lenga d’òc. Aquela Jornada Occitana s’es clavada amb un DinnarOccitan perpensat per las classas de quatrena e tresena.
 
 
Sensibilizar a la lenga occitana
 
Per las classas de corses, los escolans causiguèron d’i portar de noms de personas illustras de la cultura occitana coma, per exemple, per la sala del CDI “Alienòr d’Aquitània”, per la sala de musica “Deodat de Severac”, per la sala del talhièr abitat “Pèire Pau Riquet”. Aquel projècte de dos ans, finançat totalament pel collègi, a per tòca de sensibilizar e de democratizar la lenga e la cultura occitanas al près dels escolans mas tanben al près de la comunautat educativa (ensenhaires, personal administratiu e tecnic, tant coma los parents d’escolans). L’objectiu in fine seriá d’instituir una Jornada Occitana annualament al collègi Jean de Prades.
 
Joan Claudi Fourtanet [conselhièr pedagogic per l’occitan, NDLR] o comenta: “12 collègis sus 17 e totes los licèus de Tarn e Garona prepausan un ensenhament en lenga occitana e sus la cultura occitana”.
 
En mai d’aquò, la Carta de la Laïcitat a l’Escòla difusada pel Ministèri de l’Educacion Nacionala foguèt revirada en lenga occitana pel Rectorat de Tolosa e distribuida dins totes los establiments de l’acadèmia. Es tanben una volontat de mostrar que l’occitan participa a las règlas de foncionament de la societat e a las valors de la Republica.
 
Per l’inauguracion d’aquel projècte èran presents: Véronique Colombié, la conselhièra departamentala; Jean-Philippe Bésiers, primièr cònsol e conselhièr departamental; Joan Claudi Fourtanet, conselhièr pedagogic de l’inspeccion academica representant l’inspector d’acadèmia de Tarn e Garona; Nadia Hurreau, adjoncha al primièr cònsol; e Éric Soula, principal del collègi. Cal precisar qu’aquel projècte a suscitat d’idèas novèlas perque Jiròni Frare deuriá participar a las activitats periscolaras de la comuna, en tot donar un ensenhament en lenga occitana als pichons dels Sarrasins.
 
 
 
 
Jiròni Frare