Qualques jorns après l’eleccion municipala, aquesta dimenjada passada se son constituits los conselhs munipals de totas las comunas de l’estat espanhòl. Dins las principalas vilas, los cambiaments son estrambordants e los ciutadans o an festejat d’un biais insolit.
 
 
Pampalona: lo pòble canta los adieus a la drecha
 
Dissabte a miègjorn, la plaça de la vila de Pampalona (Bascoat) èra comola de mond que donavan la benvenguda al nòu conselh municipal, i aviá de bandièras, de bandieròlas e de cants de jòia. Lo mond cantavan “adieu, drecha, adieu” en festejar que l’Union del Pòble Navarrés (UPN), lo partit de drecha espanholista que governava la vila, quitava lo poder, e que lo nòu conselh conselh municipal èra format per una coalicion d’esquèrra, amb los partits basquistas EH Bildu e Geroa Bai en cap.
 
 
Barcelona: banh de multitud per la nòva consolessa
 
“Ai pas de mots, es uèi un jorn istoric que meritam. Las gents comunas se meritam de ganhar”. Es aital que la nòva consolessa de Barcelona, Ada Colau, mercegèt la multitud que comolava la Plaça Sant Jaume. Après son nomenament, la consolessa davalèt sus la plaça per anar al Palais de la Generalitat e parlar amb lo president de Catalonha, Artur Mas. En seguida, tornèt sus la plaça e parlèt a las gents. La consolessa, d’una coalicion ciutadana de collectius populars e d’esquèrra, demandèt al mond de restar “mobilizats”. “Cal pas repetir las errors del passat, ganhar de vertat en democracia vòl dire que los ciutadans fagan un pas endavant e que gausen governar”. Colau assegurèt que sa còla “se donariá d’a fons per n’acabar amb lo patiment de las gents”.
 
 
Badalona: se fòrabandís un govèrn racista
 
Sus la plaça de la vila de Badalona (Catalonha) i aviá de bandièras independentistas, LGBT e d’autres collectius. Una coalicion d’esquèrra e catalanista, amb Dolors Sabater en cap, a capitat de fòrabandir un èx-cònsol que faguèt una politica espanholista e clarament xenofòba, omofòba e racista.
 
L’anecdòta la protagonizèt la primièra femna musulmana conselhièra municipala de la vila, Fatima Taleb, qu’après lo jurament per la carga “per imperatiu legal”, dediquèt sas paraulas als collectius desfavorits e a l’independéncia de Catalonha; e revendiquèt una “Republica Catalana liura, sobeirana, justa socialament, plena de patz, d’amor e de convivéncia”.
 
Un grop reduch d’espanholistas èran tanben sus la plaça en manifestant lor desacòrdi amb lo nòu conselh municipal.
 
 
Se canta l’Estaca a Valéncia
 
La vila de Valéncia a viscut tanben un cambiament radical de govèrn municipal. L’èx-consolessa del Partit Popular, Rita Barberá, perdèt l’eleccion e quitament refusèt sa carga de conselhièra municipala dins l’oposicion. Lo nòu cònsol de la vila, Joan Ribó, nacionalista d’esquèrra, davalèt per dobrir las pòrtas de l’ostal de la vila. Sus la plaça, de milièrs de personas que l’esperavan li cantèron l’Estaca.
 
 
Dins d’autras vilas
 
L’esquèrra es tanben tornada a d’autras vilas de l’estat espanhòl, dont cal soslinhar Palma e Madrid, ont lo mond an recebut amb jòia los nòus conselhs municipals.