Carlos Barrera foguèt nomenat ièr sindic d’Aran dins un acte solemne a Arròs (Val d’Aran), dos jorns abans de la jornada nacionala del país occitan de cap de Garona. L’eveniment se debanèt dins lo palais nomenat Casa deth Senhor, qu’acuelh lo Conselh General d’Aran e l’Archiu Istoric d’Aran. Barrera foguèt elegit gràcias als vòtes dels sieus 7 conselhièrs generals, del temps que los cinc conselhièrs d’Unitat d’Aran (UA) e lo conselhièr del PRAG, votèron lo candidat Francés Boya.
 
Un còp proclamat sindic, Barrera remembrèt que la legislatura precedenta es estada complicada per la situacion economica e pels aigats de fa dos ans, e demandèt a l’oposicion de far pas de demagogia dins aqueles aspèctes ni los politizar, segon çò que rapòrta l’ACN. Per rapòrt a l’avenir “eth desplegament dera naua Lei d'Aran aprovada en passat gèr en Parlament de Catalonha e era melhora deth nòste finançament son es prioritats”, çò diguèt lo sindic que profichèt la preséncia de la vicepresidenta de Catalonha, Joana Ortega, per demandar “ua reünion dera Comission bilaterau Conselh Generau- Generalitat entà auançar en desplegament dera naua Lei d’Aran”.
 
La vicepresidenta acceptèt la peticion e anoncièt qu’aquesta setmana se publicarà la convocacion de la reünion, que se deu debanar a començament de julhet. Tanben soslinhèt que lo 27 de setembre, jorn de l’eleccion de Catalonha, “los devèrs devon èsser faches” en çò que tanh a Aran, e aprofiechèt l’ocasion per exprimir que li agradariá qu’aquela bona relacion que i a entre los govèrns d’Aran e de Catalonha, foguèsse parièra amb las administracions de l’estat espanhòl.
 
Barrera, de Convergéncia Democratica Aranesa-Partit Nacionalista Aranés (CDA-PNA) es sindic d’Aran dempuèi 1995, e solament foguèt a l’oposicion dins lo periòde 2007-2011, quan la maximala institucion aranesa foguèt presidida per Francés Boya, d’Unitat d’Aran (UA-PSC-CP).