Lo govèrn espanhòl a aviat una emenda contra un jove militant de 3001 èuros de sancion per portar una eissarpa amb de lèmas e de simbòls independentistas catalans e bascos, pendent la partida de fotbòl de la finala de la Copa del Rei, lo 25 de mai passat, entre lo Barça e l’Athletic de Bilbao. L’emenda ditz qu’aquel seguidor transgrediguèt la lei contra la violéncia, lo racisme, la xenofobia e l’intolerància en l’espòrt, e al delà, li an empedit l’accès als terrens esportius pendent mièg an.

La delegacion del govèrn espanhòl imputa una infraccion grèva al jove per aver accedit a l’estadi Vicente Calderón amb una eissarpa al còl on s’i podiá legir en catalan e en basco “amassa per la libertat, Bascoat e Païses Catalans”. Dins l’acusacion, lo jove es tanplan acusat d’aver tengut “una actitud de desfís”.
 
Lo jove emendat a l’opcion de s’apelar. En fach, lo partit independentista Solidaritat Catalana, ont lo jove es militant, a dich que presentaràn un recors e que vòlon denonciar per prevaricacion la delegada del govèrn espanhòl a Madrid, Cristina Cifuentes, e lo foncionari que signa l’emenda, Joaquín Pavia Cardell.
 
Cal dire qu’aquel meteis jorn de la finala de copa, de sòcis del movement faissista de la Falange Espanhòla e d’autres grops d’ultradrecha manifestèron per las carrièras de Madrid contra los seguidors del Barça e de l’Athletic de Bilbao, en exibissent de simbòls nazis. En aquel cas i a pas d’establiment de cap de denóncia ni cap d’emenda impausada.