Dimècres, la Comission Europèa a situat Mónegue e Andòrra dins sa lista dels 30 païses del Mond entièr que son los “mens cooperadors” en matèria fiscala, valent a dire, que son de “paradises fiscals”. La lista, que cobrís los cinc continents, inclutz de païses que son “almens dins la lista negra segon 10 estats membres de l’UE”, coma o a explicat l’eurocomissari dels afars economics, lo francés Pierre Moscovici. En mai de Mónegue e Andòrra, la lista tanben inclutz, d’Euròpa, Liechtenstein e Guernesey. Lo continent amb mai de paradises fiscals es America, amb d’estats coma Antigüa, las Bahamas, Belize, las Illas Caiman o Barbados. Hong Kong o las Maldivas, d’Asia, tanben se tròban dins la lista negra de l’UE, coma Libèria, d’Africa.

“Nòstra esperança es que totas aquelas jurisdiccions adòpten aviat los estandards internacionals per luchar contra l’evasion fiscala”, çò a assegurat Pierre Moscovici en una conferéncia de premsa dempuèi Brussèlas. Segon l’eurocomissari, certans estats ja son a o far o tenon l’intencion d’o far, e l’UE fa un “pas decisiu” dins la lucha contra l’evasion en publicar la lista dels estats que mens coopèran amb Brussèlas en matèria fiscala.

L’estat de Mónegue (en Occitània) amb l’estat d’Andòrra (dins los Païses Catalans) son considerats coma de paradises fiscals segon Brussèlas e, en particular, segon los membres seguents de l’UE: Belgica, Bulgaria, Croàcia, Espanha, Estònia, Grècia, Itàlia, Letònia, Lituània, Polonha e Portugal.