Jean-Gabriel Domergue (Bordèu 1889 - París 1962) foguèt un pintor occitan que qualques unes considèran qu’es l’inventor de la pin-up. Après far sos estudis dins un licèu de Bordèu e los acabar a París, es dins la capitala francesa qu’estudièt las bèlas arts e que faguèt sa carrièra.
 
Pichòt cosin del celèbre pintor occitan Enric de Tolosa-Lautrèc, Jean-Gabriel Domergue lo rescontrèt a París e amassa frequentavan lo Moulin Rouge. Pus tard Jean-Gabriel Domergue va partejar lo talhièr de son grand amic Degas, e va rescontrar Boldini que sas representacions mondanas Domergue las admirava e qu’influencièron fòrt sa pintura.
 
De fach, lo tèma de predileccion de Domergue es justament “la parisenca”, es a dire de femnas del mond del teatre de varietats qu’el representa gracilas, crocarèlas, petejantas... sovent finas amb un còl exageradament long. Es aital que lo pintor bordalés creèt un nòu modèl estetic de representacion femenina que qualques unes considèran que son “las pin-ups parisencas”. Pintèt atanben de nombrosas femnas nudas, que lors modèls èran generalament d’actrises conegudas, de dançairas e de femnas de l’aristocracia, coma Nadine de Rothschild. Atanben s’especializèt dins l’illustracion dels parelhs aristocratics que los representa a l’opèra, al teatre o a las corsas.
 
Jean-Gabriel Domergue foguèt pereu creator de mòda e dessenhèt pels cordurièrs Paul Poiret e Henry Marque.
 
Recebèt ben de reconeissenças e de prèmis e realizèt en 1939 l’aficha del Festenal Internacional del Filme de Canas. Justament dins aquela vila provençala, se tròba la Bastida Domergue, qu’expausa fòrça òbras de l’artista bordalés.