Un dels grands problèmas dels nombroses aparelhs electronics que cada jorn nos environan es la durada de la batariá. Sovent nos cal tirar de mètres de fil per los poder recargar quand lor batariá es agotada. Trobar la melhora solucion per los recargar es un enjòc màger, e dins aquel sens una còla de l’Universitat de Washington trabalha sus un router wi-fi que, en mai de porgir de connexion sens fil a Internet, alimenta la batariá de petits engenhs electronics situats a mens de dètz mètres.
 
Lo router utilizat, nomenat PoWiFi, transforma lo senhal del ret wi-fi en electrictat amb l’ajuda d’un convertidor DC a DC. L’aparelh l’an dessenhat en pensant, sustot, a la creissenta connectivitat de las causas a Internet.
 
Dins un article los creators de l’aparelh explican que l’an assajat dins sièis ostals estatsunidencs amb de bons resultats: dins la màger part dels cases, çò dison, l’usatge del router per i far passar d’electricitat a pas fach davalar lo nivèl de connexion a la linha, e a pas manco interferit amb el.