Er actuau govèrn de dreta qu'a aprovat ua reforma deth trabalh que desmonte eth marc de negociacion collectiva e daurís era pòrta ath trabalh precari e ath licenciament sense indemnizacion. Aguesta reforma ven acompanhada d'ua seguida de mesures antisociaus d'austeritat qu'an redusit salaris e servicis basics entàs ciutadans.



Pendent era jornada s'an debanat enes principaus ciutats der estat manifestacions seguides per 170 000 persones en Madrid e 270 000 persones en Barcelona, segons eth jornau El País. En Barcelona s'an debanat afrontaments fòrça violenti entre era policia e manifestants. 

Seguiment desparièr ena Val d'Aran
 



Ena Val d'Aran eth seguiment qu'ei estat desparièr deth rèste der estat pr'amor que s'agís d'un país de petit comèrç e de servicis. Era administracion publica (Conselh Generau d'Aran e bères municipalitats) qu'a decretat servicis minims; eth transpòrt public que s'ei vist leugèraments modificat; es escòles qu'an foncionat parcialaments e ues pòques desenes de persones s'an manifestat en Vielha. Era majoritat de mejans de comunicacion publics (mèdias) an seguit era cauma.

Ferriòl Macip