Aqueste dissabte 27 de junh, se debanarà a Rotlens en Malapèira la jornada de la rabassa d’estiu, Rabassa e Terrador, a l’iniciativa de l’associacion locala lo Camin del Vin.
 
An agut la bona idèa de doblar lor comunicacion en lenga nòstra, un brave exemple per totes los organizaires de manifestacions del terrador en Occitània.
 
S’adreiçan atal als curioses e epicurians per prepausar lo mercat de la rabassa e dels produits del terrador, la tasta dels vins de l’AÒP Malapèira, qualques talhièrs de cosina rabassada, qualques demostracions de cèrca del preciós campairòl per la gossatalha rabassaira e plan d’animacions: banastariá, torn a la còrda, cotelièr, amolaire, musicas, ferrièras, jòcs pels mainatges... Los golards, golafres, lipets e chapaires se recamparàn a l’entorn de la taulejada campanhòla amb tastet rabassat, entrepan a la tapenada rabassada e una doçor rabassarèla.
 
En fin de matinada, Mirèlha Braç signarà son libre Afogassets e trufariás e Alan Roch sos 2800 signes.
 
E òc, las edicions Letras d’Òc reprenon dins la colleccion Camins lo libre de Mirèlha Braç, paregut primièr en 1997 cò d’IEO-Vendémias. La primièra version s’entitolava: Afogassets o l’art de beure pas tot sol. Aquesta segonda se ditz: Afogassets e trufariás, de recèptas per l’aperitiu. Comprenètz atal que la rabassa negra es venguda mai presenta sus las taulas audencas e occitanas.
 
L’editor estipula: “Pel plaser de vos congostar e de vos regaudir en companhiá, aquí lo receptari deliciós e imaginatiu que Mirèlha Braç vos ofrís. I descobriretz tot çò que cal per vos obrir l’apetís en acomodant las siás recèptas, tant occitanas coma vengudas d’autras ribas de mar, que las poiretz acompanhar d’un veirat de bon vin.”
 
Bon, a l’Ostal Sirventés, sèti del Cercle Occitan del País de Carcassona, se vei regularament lo mond acompanhar los afogassets de mai d’un veirat de vin (es de mal demorar lo gargalhòl sec amb las bonas causas de tastar!)
 
Traparetz d’idèas per un seissantenat d’“afogassets” salats, un vintenat de sucrats (que tretze son de Nadal!), mièja dotzena de recèptas rabassadas, un plat mai que consistent (la lèbre a la reiala) e un pichon lexic culinari occitan-francés.
 
A costat dels grands classics: caviar (de merinjana), taperada, anchoiada, acras, hummus, salsissa al vin, rosòlas, favonada, moretum, ponti... d’autras recèptas vos faràn tanben ganhar l’estima dels vòstres convidats: güacamòl de caulet-bròca, pescajons garnits d’èrbas, albricòts e carnsalada, gruns de rasim e la Guiòla, esquissat de merluça, nauquets a la brandada, braç de Vènus al cambajon, troitas de color (verda: èrbas; roja: pebròt doç; jauna: carri), aluquetas al piston... E, per ne tornar a las rabassas, que dire dels calissons de brandada de merluça rabassada o de las tòstas rabassadas al “lardo di Colonnata” (un lard que demòra de meses dins de tinas de marme: perqué aguèron pas l’idèa a Caunas de Menerbés?).
 
E, çò que gasta pas res, qualques supèrbas fotografias de colors illustran las paginas e vos fan perlupar d’avança!
 
 
 
 
Ostal Sirventés