Lo president de la Generalitat de Catalonha e Aran, Artur Mas, a fach apèl a las comunautats autonòmas per far front davant los actes de “desleiautat totala” del govèrn espanhòl de Mariano Rajoy. Lo despartiment de las mesuras d’ajustament budgetari e la manca de respècte venent de l’estructura de l’estat justifican, segon Mas, la trencadura del dialòg amb l’executiu espanhòl. Artur Mas a avertit tanben al govèrn espanhòl que se paga pas los sieu deute amb Catalonha, e se repartisson pas los sacrificis, i aurà pas cap de leiautat institucionala.
 
Dins la session de contraròtle del plen del Parlament catalan, i a aguèt ièr una batèsta dialectica entre lo president Mas e la presidenta del PP de Catalonha, Alícia Sánchez-Camacho, qu’acusèt lo president catalan d’aver pas de sens de l’estat per retirar ansin lo sieu sosten al govèrn de Rajoy en un moment complicat.
 
Artur Mas respondèt qu’èra dispausat a comprene la gravetat de la situacion, mas a demandat que lo govèrn de Rajoy “pague los deutes e repartisca los sacrificis”. E a remembrat que “las autonomias son responsablas de 35% de la despensa, e lo govèrn espanhòl lor exigís d’ajustaments de 64%, mentre que l’estat fa 52% de la despensa e s’aplica una reduccion de 31%”. E a apondut: “A las autonomias, se nos demanda lo doble, e lo govèrn espanhòl fa la mitat. E o nos cal aplaudir? Disèm non, disèm pro, e caldriá qu’o faguèsse tot lo sistèma autonomic pr’amor qu’es un acte de desleiautat totala”.