Los taxistas del país mostrèron aqueste dijòus passat lor colèra. La decision de la societat californiana Uber de l’installar a Marselha descadenèt de protèstas violentas a Marselha, Tolosa, Niça e Bordèu perque considèran que se tracta d’una “concurréncia salvatja” e illegala. Pasmens, es a París que s’es vist los incidents mai violents. Lo ministre francés de l’interior, Bernard Cazeneuve, demandèt la proïbicion immediata de l’aplicacion Uber Pop.
 
Aperaquí 3000 taxistas se son mobilizats en cremant de pneumatics e en talhant la circulacion. Lo trafec de Bordèu demorèt practicament paralisat pendent qualques oras, e dins qualques autoestradas e periferics alentiguèron la circulacion.
 
En decembre passat, Cazeneuve aviá promés que proïbiriá Uber a partir de genièr. Mas de son costat, Uber es a far una batalha juridica que per ara li permet d’operar e, per tant, es disponible a Bordèu, Tolosa e Niça.
 
Uber es una societat californiana, qu’amb 13,35 miliards d’èuros, a fach una de las avaloracions mai nautas de las dichas “start-ups”. Se tracta d’una aplicacion de transpòrt collaboratiu que met en contacte dirèctament de passatgièrs e de menaires particulars per far de desplaçaments amb de tarifas fixadas d’avança.



Le 18:18 : taxis-CRS, le face-à-face vire à l...per LaProvence