La comuna d’Auriveta (Val de Ròia) organiza l’ochena edicion de sa famosa Fèsta Occitana, dissabte 21 de julhet. Los vesitaires poiràn participar a las danças e assistir als concèrts de Marasma Folk, Lo Truc e l’Ensemble Irish Occitano.

Dissabte que ven, lo 21 de julhet, Auriveta [Olivetta San Michele] (Val de Ròia), ofrirà al public una granda serada consagrada a la cultura d’òc a travèrs de la musica, del divertiment e de la gastronomia. Serà l’ochena edicion de la famosa Fèsta Occitana qu’a aquerit, d’ara enlà, un polit prestigi.
 
Auriveta se tròba a l’extrèm sud de las Valadas Occitanas, al limit dels Alps e près de la Mediterranèa. Depend de l’estat italian. Es la sola comuna situada dins la region de Ligúria que fa aplicar, per la totalitat de son territòri, la lei italiana 482/1999 sus la proteccion de las minoritats lingüisticas. Aital Auriveta s’es definida coma una comuna de lenga occitana. Una autra comuna de la region de Ligúria, Triueira [Triora], fa aplicar aquela lei per los masatges de Reaud [Realdo] e Verdeja [Verdeggia].
 
Las associacions culturalas localas organizaràn l’aspècte gastronomic de la serada. La dimension musicala se celebrarà amb los grops Marasma Folk, Lo Truc e l’Ensemble Irish Occitano, que jogaràn dins las divèrsas borgadas compausant la comuna. Ja que las edicions precedentas aguèron de succès, se conselha d’arribar d’ora: los repaisses començaràn a 20h e los concèrts a 22h.
 
Informacions e contactes: 0184 222333 - 349 8625227 - 329 1512290
 
Informacions extrachas mai que mai del sit web San Remo News.