Lo parlament grèc, la Vouli, a aprovat de matin per una clara majoritat la convocacion d’un referendum sus las mesuras prepausadas pels creditors internacionals en escambi d’esperlongar lo crèdit. Lo vòte parlamentari se faguèt lo matin de dissabte a dimenge, après que los sòcis de Brussèlas aguèsson refusat d’esperlongar lo crèdit. Lo debat durèt 14 oras e visquèt de moments de tension maximala, mas fin finala, la proposicion del govèrn de Tsipras foguèt aprovada per 178 vòtes per, 129 vòtes contra e pas cap d’abstencion.
 
Los creditors ofrissián de desblocar una partida de l’ajuda en escambi de nòvas retalhadas e d’una pojada de l’IVA (impòst sus la valor aponduda), çò que lo govèrn grèc considèra impossible d’acceptar. E ara ven al pòble grèc d’o decidir dins un exercici de democracia.
 
La situacion es extrèma perque deman expira lo relambi per que lo govèrn grèc torne 1,6 miliard d’èuros al Fons Monetari Internacional (FMI), un argent que Grècia lo ten pas. Los ministres de l’economia de l’Eurozòna refusèron dissabte d’esperlongar lo plan de salvament de Grècia delà dimars 30 de junh. Se dona las negociacions per trencadas, pr’amor que l’Eurogrop accèpta pas que siá lo pòble grèc que decidisca en referendum s’accèpta aquelas mesuras. Cal dire que las mesuras que la tròica las prepausa rendrián encara pus dura la vida vidanta dels grècs, que pagarián mai d’impòstes, qu’aurián de salaris inferiors e que recebrián mens de servicis de l’estat.
 
Lo parlament grèc s’es pas somés a las menaças de Brussèlas e a sostengut la proposicion del primièr ministre Tsipras. “La democracia es la valor suprèma de Grècia e doncas lo referendum se farà malgrat la decision de l’Eurogrop”, çò diguèt Tsipras. Lo referendum se farà dimenge que ven e la question que i respondràn los ciutadans es s’accèptan o se refusan las linhas generalas presentadas per l’anciana tròica. S’acceptavan, la tròica prestariá 15,5 miliards d’èuros al país ellèn.
 
Alexis Tsipras a demandat als ciutadans grècs de votar de “non”. “Dins los cinc meses passats, aqueste govèrn a luchat dins de condicions d’asfixia economica sens precedents per complir sas promessas”, çò diguèt. Segon Tsipras, la decision de far aquel referendum “representa pas una rompedura amb Euròpa mas una rompedura amb las tacticas qu’otratjan Euròpa”.
 
Tocant lo Fons Monetari Internacional (FMI), los mots de Tsipras foguèron durs. Tsipras critiquèt l’insisténcia de l’FMI a aumentar l’IVA de las ostalariás del 6,5% al 23% (lo govèrn prepausava lo 13%). Cal dire que lo torisme es primordial per l’economia grèga. “Nos demandan pas d’arribar a un acòrdi mas de liurar la nòstra dignitat politica”, çò diguèt. “La dignitat d’un pòble es pas en jòc”, çò apondèt, en tot precisar que los acòrdis signats amb la tròica pels govèrns precedents an agut de “consequéncias dramaticas”. Pr’amor d’aquò demandèt de votar de “non” al referendum e de “mandar un message fòrt de dignitat a Euròpa e al Mond”.


Barradura de las bancas
 
Las bancas seràn uèi barradas e se contrarotlarà lo capital en Grècia, segon çò qu’anoncièt arser Tsipras en un discors a la television. Tsipras ditz que la Banca de Grècia s’es vista obligada de demandar la barradura de las bancas per aqueste diluns en seguida de la decision de la Banca Centrala Europèa (BCE) de gelar la linha de liquiditat d’emergéncia. Lo primièr ministre grèc acusèt la BCE e l’Eurogrop de voler “reprimir la volontat del pòble grèc” e assegurèt que lo pagament dels salaris e de las pensions es garentit. Atanben precisèt que “los depauses bancaris son completament protegits”. “La nòstra sola paur es la paur”, çò diguèt, en tot reconéisser que Grècia afronta de moments “critics” e que caldrà de “paciéncia”.
 
Segon Tsipras, la decision de l’Eurogrop d’aprovar pas la demanda d’esperlongar lo crèdit es “una provocacion sens precedents” contra la democracia e a entraïnat que la BCE aja pas aumentat tanpauc la liquiditat per las bancas grègas. E apond: “es aquò qu’a obligat la Banca de Grècia de convocar la barradura de las bancas e la contencion dins la retirada de capitals”.