De fòrças navalas de l’armada israeliana abordèron ièr de nuèch un dels vaissèls que fan partida de la tresena Flòta de la Libertat, que vòl trencar lo blocatge impausat per Israèl a la Lista de Gaza dempuèi uèch ans. Se tracta del vaissèl Marianne, interceptat en d’aigas internacionalas quand se dirigissiá cap a Gaza al costat dels vaissèls Juliano II, Rachel e Vittorio. Segon un comunicat de l’armada israeliana, “après agotar totes los canals diplomatics, lo govèrn israelian a ordenat a l’armada de redirigir un vaissèl per evitar que trenque lo blocatge naval de la Lista de Gaza”.
 
Lo Marianne, amb lo deputat araboisraelian Bassel Ghattas, l’èx-president tunisian Al Munsif Al Marzuqi e l’eurodeputada Ana Miranda a bòrd, lo menèron al pòrt d’Ashdòd.
 
Dins lo meteis comunicat se rapòrta qu’“a pas calgut emplegar la fòrça” e que l’abordatge s’es fach “sens incidents”.
 
Los vaissèls de la tresena Flòta de la Libertat vòlon arribar a la Lista de Gaza per i portar d’ajuda umanitària e “trencar lo blocatge d’Israèl” als palestinians. L’iniciativa, qu’amassa d’activistas de qualques estats, s’inspira d’una precedenta Flòta de la Libertat qu’en 2010 foguèt abordada en nauta mar per l’armada d’Israèl.