Lo presumit criminal de guèrra nazi mai recercat del mond, l’ongrés László Csatáry, foguèt arrestat dimècres passat a Budapèst (Ongria), segon una informacion del parquet del país centreuropèu. L’òme, de 97 ans, es enquestat coma acusat, del temps que las autoritats judicialas an començat lo procès per lo metre jos arrèst domiciliari.

Lo Centre Simon Wiesenthal, consagrat a la persecucion de criminals nazis, lo responsabiliza d’aver mandat mai de 15 000 personas al camp d’exterminacion d’Auschwitz, en Polonha. László Csatáry èra policièr d’un guèto josieu en Eslovaquia pendent l’ocupacion nazi en la Segonda Guèrra Mondiala e auriá dirigit un campament d’internament nazi a Košice.
 
Lo presumit criminal de guèrra viviá sens amagar la siá identitat a Budapèst dempuèi 17 ans. Las autoritats ongresas o avián constatat en octòbre, mas la siá arrestacion s’es precipitada après que dos jornalistas del jornal britanic The Sun lo localizèron e ne publiquèron de fotografias dimenge passat.
 
Csatáry foguèt condemnat a mòrt dins l’anciana Checoslovaquia après la Segonda Guèrra Mondiala. Mai tard, Csatáry fugiguèt en Canadà, d’ont se n’anèt quand li retirèron la ciutadaniá, e s’installèt a Budapèst.
 
Tre 1944, qualques 450 000 josieus ongreses foguèron assassinats en divèrses camps d’exterminacion.