Ièr dimècres intrèt en vigor dins l’estat espanhòl la nòva Lei de Seguretat Ciutadana e la darrièra reforma del còde penal espanhòl, popularament nomenada “Lei Badalhon”, que provoquèt de protèstas dins las principalas vias. La lei s’aprovèt al Congrès dels Deputats dins un temps recòrd pel Partit Popular e tròba l’oposicion de totes los autres partits politics de l’estat, e tanben l’oposicion de l’Union Europèa, de l’ÒNU, d’Amnestia Internacionala e d’autras entitats de dreches umans. Los opausants considèran que la lei limita de dreches fondamentals dels ciutadans coma la libertat d’expression e lo drech de manifestacion. Amb lo nòu còde penal, per exemple, s’introdutz la preson a perpetuitat, s’empedís d’enregistrar las accions de la polícia a las manifestacions, s’enebís las manifestacions non comunicadas, se proïbís la resisténcia pacifica e se permet d’expulsar sul pic los immigrants que passan la frontièra de Ceuta o Melilla. E mai, las polícias dels govèrns autonòms, coma es lo cas dels Mossos d’Esquadra en Catalonha e Aran, auràn pas accès a las basas de donadas internacionalas, que seràn solament reservadas a la polícia de l’estat.
 
La lei pervei de multas de 601 a 30 000 èuros per l’usatge non autorizat d’imatges de policièrs; fins a 600 000 èuros per las manifestacions non comunicadas davant las “infrastructuras grèvas”; e de 601 a 30 000 èuros per las accions que darrièrament se fan per empedir las expulsions de las familhas de lors lotjaments per manca de pagament.
 
 
Se punís la resisténcia pacifica
 
Aquela reforma elimina del còde penal çò que fins ara èra considerat coma de “fautas”. Ara totes los faches punidors seràn considerats coma de delictes. Se punís la resisténcia pacifica en las manifestacions, un delicte que s’apond al d’atemptat e de desòrdre public dins lo cas d’incidents amb la polícia.
 
Aquò es la 28a reforma del còde penal espanhòl e, en mai de tot aquò, tanben punís pel primièr còp lo maltractament, l’abandon e l’esplecha sexuala dels animals. Prevei tanben de penas e de sancions pels promotors dels combats de cans e de gals.
 
La nòrma enduresís las sancions contra la produccion de materials qu’inciten a l’òdi e la violéncia per de rasons de raça, sèxe, orientacion sexuala, religion o origina nacionala, e tanben per aver de material destinat a la violéncia o l’umiliacion d’aqueles grops.
 
 
Amnestia Internacionala i vei una “grèva reculada per la libertat d’expression”
 
Amnestia Internacionala a criticat durament aquela reforma penala. Dins un comunicat assegura que se tracta d’“una grèva reculada per la libertat d’expression e de reünion” perque dificulta aqueles dreches e evita los crimes de drech internacional. La reforma —çò dison— aumenta las penas e de delictes contra los manifestants “sens cap de justificacion”, e ditz coma exemple lo fach que se considèra ara fòrça mai grèu lo delicte contra l’autoritat quand se produtz dins lo contèxt d’una manifestacion, e punís de preson la resisténcia pacifica. 
 
L’organizacion a publicat una lista dels contenguts sus Internet qu’ara son de delictes.