La Cort d’Apelacion d’Ais de Provença estimèt ièr dijòus que lo certificaire alemand TÜV Rheinland aviá pas cap de responsabilitat dins l’escandal de las protèsis de popa defectuosas, e deurà pas indemnizar las 400 000 victimas, çò rapòrta le Figaro.
 
La cort a dich que l’agéncia alemanda de certicicacion aviá “respectat leis obligacions coma organisme certificaire”. L’avocata de l’agéncia, Cécile Derycke, a explicat que la companhiá se felicita pel verdicte. “La fraudariá comesa per PIP poiriá pas èsser detectada per TÜV Rheinland amb los espleches liurats a las organizacions de certificacion segon la nòrma en vigor”, çò a soslinhat.
 
TÜV Rheinland es una societat alemanda que se consagra a certificar la qualitat de fòrça produches, tant de dispositius medicals coma de sits nuclears. La societat foguèt fondada en 1872 e emplega a mai de 17 200 salariats dins 65 païses. Segon lo Tribunal de Comèrci de Tolon, TÜV Rheinland manquèt sas obligacions de contraròtle suls los procèsses de fabricacion e qualitat de l’entrepresa Poly Implant Prothèse (PIP) que fabricava las protèsis de popa de marrida qualitat, çò que permetèt que se distribuiguèsson per tot lo Mond.
 
Lo fondador de PIP, Jean-Claude Mas, foguèt condemnat en 2013 per la justícia francesa a quatre ans de preson per la venda d’aquelas protèsis, a una multa de 75 000 èuros e a la retirada dels permeses que l’acreditavan per exercir.
 
 
Un megaprocès contra PIP en Marselha
 
Lo jutament per l’escandal sanitari causat per las protèsis de PIP se debanèt en març de 2013 al Pargue Chanòt de Marselha. Un tribunal excepcional jutgèt los cinc dirigents de PIP, valent a dire, Jean-Claude Mas e los quatre autres dirigents. PIP emplegava de gèl industrial per far de protèsis de popa de silicòna, çò qu’afectèt 500 000 femnas.
 
Lo grand procès comprenguèt las 5 127 demandantas e gaireben 300 avocats e se debanèt dins un espaci pas brica abitual. Pr’amor de sas grandas dimensions, la justícia loguèt un airal de 4 800 mètres cairats del Pargue d’Exposicions Chanòt, a Marselha, per 800 000 èuros.
 
Jean-Claude Mas escapava als contraròtles sanitaris de las autoritats francesas e europèas en emplegant un gèl industrial e non pas de silicòna sanitària, per fin d’estalviar d’argent. Segon los expèrts, PIP emplegava un gèl industrial illegal que costava 1,65 èuro per implant, en luòc d’emplegar de gèls certificats que còstan 11,55 èuros. Aquò supausèt per PIP un profièch èxtra d’un milion d’èuros per cada 100 000 implants fabricats.
 
En març de 2010, las autoritats sanitàrias francesas enebiguèron l’utilizacion de las protèsis PIP après divèrses cases de rompeduras. A la fin de 2011, aquel meteis organisme recomandèt de retirar totes los implants de PIP. Cal dire, pasmens, que PIP obteniá l’84% de son profièch en defòra de l’estat francés, mai que mai de l’America del Sud.