La BBC a dobèrt un sit web ont se pòt veire los ligams dirèctes vèrs totas las nòvas que lo cercador Google a degut retirar en seguida de la senténcia de la Cort de la Justícia de l’Union Europèa sul drech a l’oblit de mai de 2014. Los jutges de Luxemborg decidiguèron que Google e los autres cercadors èran obligats d’escafar de lors resultats las informacions “insignificantas e tresanadas” dels ciutadans qu’o sollicitèsson exprèssament. Qualques mèdias, coma la BBC, s’i son opausats e an publicat los ligams de las nòvas que los cercadors an retirat en Euròpa.
 
Dins un article del blòg del capredactor de BBC Online, Neil McIntosh, se detalha las adreiças de totas las nòvas que son estadas retiradas dels cercadors en compliment de la senténcia del drech a l’oblit, classificadas per meses dempuèi julhet de 2014 fins ara. La ràdio e television britanica s’es engatjada a actualizar aquela lista cada mes.
 
Amb la publicacion de la lista, la BBC aspira tanben a “establir un referent” pels autres mèdias europèus.