Lo partit de Gilles Duceppe vòl recuperar lo terren perdut al vòte de 2011, quand lo Nòu Partit Democrata obtenguèt una victòria larga en Quebèc. La campanha se centrarà sus uèch grandas rasons per l’independéncia.

Lo Blòc Quebequés (BQ) a mes en marcha una “campanha permanenta per l’independéncia” que durarà, almens, fins a las eleccions federalas canadianas, que se devon celebrar lo 19 d’octòbre que ven. Lo partit aprofechèt la dimenjada precedenta de la jornada nacionala quebequesa, lo 24 de junh, per menar a tèrme una campanha pòrta a pòrta dins la vila de Rimouski per explicar als ciutadans los beneficis de l’independéncia.
 
La campanha del BQ emplegarà d’arguments centrats sus uèch grandas rasons que, segon lo partit, los quebequeses deurián, eles, decidir per l’independéncia. L’autogovèrn, la prosperitat economica, la qualitat de vida, l’inclusion dels nòuvenguts e la dobertura de Quebèc al Mond son qualques unas de las rasons que lo partit a identificat.
 
Dins las eleccions canadianas de 2011, lo Blòc Quebequés obtenguèt 4 dels 75 sètis que s’elegissián en Quebèc. Un resultat nefast pel partit independentista, qu’en 2008 aviá obtengut 49 sètis.
 
Ara lo Blòc vòl recuperar un ròtle mai destacat dins la Cambra de las Comunas de Canadà, sustot amb la perspectiva que los tres principals partits canadians (conservators, liberals e neodemocratas) obtengan un resultat fòrça similar e que cap d’eles atenga la majoritat absoluda.
 
Fa qualques setmanas, los sondatges disián que lo Blòc aviá una intencion de vòte, en Quebèc, d’entre lo 13% e lo 16%, qu’amb fòrça probabilitat los auriá daissats quitament amb mens de sètis que fa quatre ans. Mas après que los independentistas decidiguèsson de far tornar Gilles Duceppe al cap de la candidatura, sonque en un mes l’intencion de vòte s’es plaçada entre lo 25%e lo 26%, encara en dessota dels ganhants de 2011 en Quebèc, los neodemocratas, que recebrián ara entre lo 32% e lo 36% dels vòtes (lo 43% fa quatre ans).
 
 
 
 

---

Aquesta nòva es adaptada de Nationalia, amb qui Jornalet a un acòrdi de cooperacion