Actualitats
La Mòstra de Cinèma Occitan a projectat 68 filmes dins sas uèch edicions
Dins l’edicion de 2015 cal soslinhar lo documentari Aqueth dia i auie ua nòça (2014), de Mireia Boya e Natàlia Lloreta, sus l’invasion republicana en Aran pendent la dictatura franquista
La Mòstra de Cinèma Occitan, que celèbra ongan son ochena edicion, a projectat long de sa trajectòria 68 títols en lenga occitana dins totes sos accents. Dempuèi sa creacion en 2008, la mòstra aumenta cada an las localitats d’exibicion, tant en Catalonha coma en Occitània, de las Valadas fins a Aran.
L’ochena edicion de la Mòstra de Cinèma Occitan s’inaugurèt lo 16 de junh passat a Lhèida (Catalonha) e se clavarà lo 2 de decembre a Barcelona, en passant per una cordelada de vilas d’Occitània, e tanben per Catalonha. E mai, coma arunan, la Mòstra es presenta dins qualques universitats coma l’Universitat de Lhèida, l’Universitat de Barcelona o l’Universitat Catalana d’Estiu, a Prada de Conflent.
Demièg los filmes que se presentan ongan, cal soslinhar lo documentari aranés Aqueth dia i auie ua nòça (2014), de Mireia Boya e Natàlia Lloreta. Lo documentari descriu, a travèrs de la votz dels testimònis, los faches del 19 d’octòbre de 1944, quand un grop de maquisards exiliats dins l’estat francés intrèron dins la Val d’Aran amb la tòca de combatre lo regim de Franco. Una aventura que durèt solament onze jorns e que se coneguèt coma l’“Operacion Reconquista d’Espanha”. Lo filme es lo primièr document audiovisual que se fa sus aquel episòdi de l’istòria amb de testimònis dirèctes d’aqueles faches.
D’autres filmes que se pòdon veire dins aquela edicion son: Crosada (1997, Michel Gayraud), una òbra de ficcion a partir del poèma epic la Cançon de la Crosada contra los catars; Eras Hemnas dera Baderca (2014, Joan Pau Ferré), testimòni oral de l’anciana vida rurala e de la cultura occitana dels Pirenèus; Flamenca (1994, Michel Gayraud), adaptacion d’un roman occitan del sègle XIII; Gasconha [Gascogne] (2014, Stéphane Sinde), filme de ficcion sus de vacanças de joventut en un ostal d’apicultors; la Balma [la Barma] (2013, Fredo Valla), documentari sus la vida dins una abitacion rupèstra o balma dels Alps Occidentals; lo Truelh d’Arsin (2014, IEO Lemosin), documentari a l’entorn d’un ancian molin d’òli suls ancians mestièrs rurals.
La Mòstra a la tòca de promòure la coneissença de la realitat occitana a travèrs de las creacions cinematograficas e se debana dins l’encastre de a difusion de l’occitan consent amb la lei 35/2010 de l’occitan de Catalonha.
Dins cada edicion s’exibisson entre 7 e 12 produccions, çò es 4 oras e mièja de programacion audiovisuala en occitan.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Tot això s'anima cada cop mès! La llengua és molt imoprtant és part de l'identitat d'una nació, i tantsn films en Occità fa patxoca.
Visca la Terra...Lliure!
Ausisse sovent que la nòtra linga z-es 'na linga moderna coma las autras! Sei ben d'accòrdi, mas crese que le fau dire a queus que fason de filmes, pardeque chasques còps que vese de producions en òc, pàrlan dau temps passat o de las velhas parsonas. Òc-ben, par surat le faliá far e sabe ben que la nòtra linga ten un passat franc famós ambei los trobadores... Mas, me pense qu'ara z-es le moment e qu'aquò podriá èsser interessant de veire de filmes que pàrlan d'autras besunhas. Par eissemple, pardeque pas de filmes policeirs que se passarián en Occitània daus jorns d'an-ueit? Qu'es coma quò, en far de filmes aitau, que lhi balharem un imatge moderne (en mai d'aquò, seriá originau!).
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari