5 637 quilomètres a travèrs de 187 cantons o país, 6 estats d’Euròpa —mas sustot dins l’estat francés—, 4 mes de temps... Lo torn ciclista, que ten lo nom basco d’Alternatiba, partiguèt de Baiona (Bas Ador, Occitània) fai un mes, lo 5 de junh, Jorn Mondiau de l’Environament, e lo faràn arribar a París lo 26 de setembre, Jorn sens Veitura e Jorn francés de la Transicion Ciutadana.
 
Queu torn es estat farjat per se far boirar las associacions localas dins los domenis de l’environament, de la natura, dau sociau o dau sindicalisme per exemple. Mas lo sistèma es dobèrt au mond de l’espòrt, aus estudiants, aus chantadors, aus dançaires e en particular a las declinasons femeninas d’aquelas activitats. Los collectius aitau montats son convidats a participar aus darriers bocins dau chamin dins las arribadas segon las possibilitats e mai que tot abans de jónher los vilatges d’estapa ont i a la presentacion dau projècte, de las conferéncias e de las associacions.
 
La finalitat dau torn es de far s’amassar las gents dins la lucha contra los chamjaments dins lu clima e, aitau fasent, de demandar tant a aquelas gents coma aus elegits de s’engatjar fàcia au desfís climatic. Lo torn es maitot l’enchaison de far la promocion d’alternativas vertadieras au sistèma actuau, per exemple dins l’abitat o maitot dins los chamins corts per lo legum. I a mai de 180 estapas: son aitant d’encontres emb los ciutadans a l’entorn d’una projeccion o d’un debat, lo temps d’una revolucion de la bicicleta…
 
90 amassadas publicas son d’imaginar long dau chamin. La setmana passada a Marselha aquò foguèt una reüssida maugrat lo bandiment per la mairariá. N’i a d’autras a Bordèu o en Lemosin que se passaràn mielhs. Segon los organizaires d’Alternatiba, qu’es lo sistèma que fau desboirar, non pas lo clima.
 
 
 
JP la Rapieta / Redaccion