Los deputats de l’Assemblada Nacionala francesa votèron la fin de las ajudas fiscalas a las oras suplementàrias instauradas en 2007. L’abrogacion d’aquela mesura, simbòl del “trabalhar mai per ganhar mai” de Nicolas Sarkozy, èra una de las promessas de campanha de François Hollande.

L’Assemblada Nacionala francesa metèt fin dimècres passat a la majoritat de las ajudas a las oras suplementàrias instauradas en 2007, simbòl del “trabalhar mai per ganhar mai”, après una fòrta discussion pendent dos jorns entre los partits d’esquèrra e de drecha.
 
L’article 2 del projècte de lei de finanças rectificativa, que conten aquela mesura, es estat aprovat per 89 vòtes, es a dire, per totes los grops d’esquèrra, del temps que los 63 vòtes contra son venguts de l’UMP e de l’UDI.
 
Ansin, tre lo 1r de setembre s’acaban las exoneracions de cotizacions socialas (salarialas e patronalas) sus las oras suplementàrias, e tre lo 1r d’agost l’exoneracion d’aquestas oras de l’impòst sul revengut.
 
Aital “i aurà pas de retroactivitat”, soslinhèt lo ministre del Budget Jérôme Cahuzac, perque lo 1r d’agost, çò diguèt, la lei “serà en camin, a qualques jorns puèi, serà promulgada”. Los socialistas se son ordenats a l’opinion del govèrn. La perspectiva d’una retroactivitat al 1r de genièr 2012 foguèt abandonada diluns, perque quitament s’aviá economitzat 500 milions d’èuros de mai, auriá fach cridar l’oposicion a l’”escandal”.